IKADUHA pa lang ka adlaw apan liboan na ka mga Dabaonon ang nakadawat sa halos 100 nagkalain-laing matang sa serbisyo hatod sa BEST PEOPLE Festival of Services didto sa Limbaan, New Corella, Davao del Norte.
Sa adlaw’ng Lunes, Pebrero 19, 1,200 ang nagpalista samtang 1,000 sab ang natala pagka sunod adlaw’ng Martes gikan sa mga barangay Cabidianan, Macgum, Sto. Niño, Suawon ug Limbaan aron makadawat ug mga serbisyo gikan sa tanang departamento sa DavNor Kapitolyo, pipila ka nasyonal nga ahensya ug lokal nga panggamhanan sa New Corella. Gilimitahan na ang gidaghanon tungod kay dili sab maserbisyohan ang tanan.
“Dako ang akong kalipay nga nagkatapok kita karong adlawa ug sa sunod upat pa ka adlaw aron atong masinati ang pinakadako, pinakalapad ug pinaka komprehensibo nga serbisyo caravan sa Davao del Norte, mao ni ang atong BEST PEOPLE Festival of Services. Sa una man gud ang ing-ani nga programa kasagaran usa ka adlaw lang unya daghan pod ang dili matabangan. Karon nagdesisyon mi lima ka adlaw na ni nga aktibidades para ang uban nga dili makaanhi sa unang adlaw pwede pa sila mobalik sa ikaduha ug ikatulo hangtod ikalima ka adlaw. . Atong pag-pyestahan ang halos usa ka gatos nga mga programa, proyekto ug serbisyo nga regular nga ginahatag sa Kapitolyo, national government agencies ug munisipyo,” pangbukas nga mensahe ni Gobernador Anthony del Rosario niadtong Lunes, Pebrero 19.
Ang Festival of Services kahigayonan sab aron direktang mapaminawan sa Gobernador ang gustong programa nga dawaton sa mga lumulupyo.
“Kini nga Festival of Services usa usab kini ka maayong pamaagi aron ako mismo makadungog sa inyong mga panginahanglan. Unsa ba gayod ang tama nga proyekto ug programa nga makatubag sa inyo. . Dapat atong ma-estoryahan ug ma-planohan,” padayong mensahe ni Gob AGR.
Mapasalamaton gayod si New Corella Mayor Rhodora Alcoran nga didto pa gyod sa iyang ginsakpan gilusad ang pagbukas sa festival of services.
“Nagpasalamat ko labaw sa tanan sa probinsya sa Davao del Norte headed by the Honorable governor Anthony del Rosario sa inisyatibo pinaagi niining caravan of services nga itunol ang tanang serbisyo gikan sa probinsya ngadto sa baryo. So far nagsubay ta sa mga departamento ug nakita nato nga ang pinaka-daghang nagline-up ang atong medical and dental services. . Salamat kaayo ko ug dako. .dako kaayo atong pasalamat sa nag-initiate ini nga program actually this is really suited sa panginahanglan sa atong katawhan kay gi-anhi na man gyod sa atong barangay,” pahayag pasalamat ni Mayor Alcoran.
Inubanan sa gikinahanglang empleyado, ang tanan regular nga mga serbisyo sa DavNor Kapitolyo uban sa pipila ka mga nasyonal nga ahensya sama sa LTO, DSWD, DFA, PSA ug DOH kauban ang munisipyo sa New Corella, tanan nagtambayayong aron ihatod ngadto sa nahisgotang sa mga lumulupyo sa nahisgotang lima ka barangay.
