DILI LANG ang naandan nga mga serbisyo sa probinsyal Kapitolyo sa Davao del Norte ang ihatod ngadto sa mga Dabaonon kundili ilakip na sa “menu” of services ang renewal sa Professional License, Driver’s License, Pasaporte ug ang pagtunol sa mga Titulo sa Yuta ngadto sa mga Dabaonon.

Kini ang nadesisyonan atol sa ika-upat nga miting sa mga department heads ug mga focal persons alang sa BEST PEOPLE Festival of Services Myerkoles, Enero 31 nga nag-apil sa ubang ahensya sa gobyerno nga buot sab mopaabot sa ilang serbisyo.

“Kani nga festival though initiated by the province will now be a collaborative activity of the national government, of course the Armed forces of the Philippines, the PNP, the provincial government and the local government particularly the municipalities and cities and the barangays concerned. So kitang tanan gyod ang involved ani,” matod ni Provincial Administrator Samson J. Sanchez.

Dili lang usa ka adlaw apan usa gayod ka semana ang paghatod sa nagkalain-laing serbisyo ngadto sa mga barangays nga gi-cluster.

Puli-pulihon paghatod ug serbisyo ang duha ka distrito sa probinsya hangtod makadawat na ang tanang 223 ka barangays. Sugdan kini sa semana sa Pebrero 18-22, 2018 didto sa Limbaan, New Corella diin ang mga barangays sa Cabidianan, Macgum, Sto. Niño ug Suawon ang naapil sa maong cluster. Ang lima ka barangays sa Braulio E. Dujali sa ikaduhang distrito mao sab ang mosunod nga anha magtapok sa barangay Poblacion pagka Marso 2-7, 2018.

Ang paghatod sa BEST PEOPLE Festival of Services wala sab magpasabot nga biyaan ang naandan nga trabaho sa Kapitolyo hinuon normal gihapon ang tanang transaksyon. Sanglit “add-on” nga serbisyo ang festival of services, miapelar ang probinsyal administrador nga angayan lamang nga adunay managsama nga tumong ang tanang nalangkit sa paghatod sa gikinahanglang serbisyo.

“Let me repeat again my appeal to everyone that please pareha ta ug chemistry, pareha ta ug momentum, pareha ta ug degree of enthusiasm for this festival of services because this is we believe and we are convinced that this is one way that we can deliver the BEST PEOPLE public services which our fellow Dabaonons deserve,” paniklop nga apelar sa probinsyal administrador.

Ang pagpaduol sa BEST PEOPLE nga mga serbisyo gilaoman nga makahatag gayod ug dakong tabang sa mga Dabaonon nga makadaginot ug kwarta ug panahon ilabina ang lagyo ug suok nga mga barangays.

DavNor News