GIPADAPLIN una ang computers, camera ug microphones aron hawiran ang kutsilyo ug ubang gamit sa pag-andam ug pagluto sa Ham, Embotido ug Siomai, karong adlawa, Lunes, Disyembre 18, 2017 didto sa Bulwagan ng Karunungan.

Kini ang gihimo sa tibuok opisina sa Provincial Information, Communication Knowledge and Management Office (PICKMO) nga nagpatudlo ilawom sa programa sa Gender and Development (GAD) sa pakig-alayon sa Employment and Workforce Development Division (EWDD).

Ang probinsyal nga panggamhanan pinaagi sa GAD nagtagana sa gikinahanglan pondo alang sa mga pagbansay dili lang sa pagluto lakip na sa mga katakos nga gusto makat-onan sa mga empleyado sa tanang departamento sa Kapitolyo.

“Ang tumong ug tinguha ani dili lang kay tungod naa ta’y budget from GAD kundili masabtan sa mga kalalakihan nga ang pagluto diay dili gyod lalim. Kini dili lang gipakita nga kabalo mo magluto kundili gipakita ang equal works sa babae ug sa lalake sa pag-amoma, sa pag-atiman sa balay sama sa pagluto,” matod ni PICKMO department head Sofonias Gabonada, Jr.

Gibahin sa lima ka grupo, nag-indigay kung kinsa ang unang makahuman ug kinsa sab ang pinakalami nga luto sa embotido ug siomai. Ang ham nagkinahanglan pa ug 7 ka adlaw nga pagtipig (curing) aron gyod masuhop sa karne ang mga sangkap ug lamas niini. Hinuon ang gi-sample nga ham nga gipondo lang ug sobra usa ka oras ug dayon gipabukalan sa nilamasan nga “sauce” sulod sa usa ka oras ug tunga naghatag sa iyang kalami nga lisod balibaran.

Katuyoan gayod sa administrasyon ni Gobernador Anthony del Rosario pinaagi sa BEST PEOPLE development agenda ilawom sa kataposang letrang “E” nga nagkahulogan ug Employment and Livelihood Opportunities, nga ang tanang Dabaonon sa tibuok Davao del Norte mapakusog (empowered) pinaagi sa pagsangkap sa kahibalo ug katakos nga magamit sa pagpangita ug dugang kita o kaha panginabuhian.