SULOD sa upat ka hugna, gidala ang Spiritual Moral Recovery Program (SMRP) ngadto sa lain-laing dapit sa Davao del Norte aron palig-onon ang pagkupot sa maayong pamatasan sa mga Dabaonon ilabina sa mga batan-on.

Atol sa paglibot gitutokan sa SMRP ang nag-unang mga suliran sa mga kabatan-onan labot sa pre-marital sex, teenage pregnancy, drug abuse, internet addiction, bullying, panigarilyo ug mga bisyo, ug daghan pang topikong suliran aron mahatagan ang mga batan-on sa hustong impormasyon ug sa mga daotang epekto niini.

Gipangunahan ni SMRP head coordinator Pastor Edwin Santos ang upat ka hugna sa paglibot isip pag-obserbar sa Filipino Values Month sumala sa Presidential Proclamation No. 479 s. 1994 nga gipirmahan ni kanhi Presidente Fidel Ramos. Lain sab nga katuyoan sa paglibot sa SMRP ang paglusad sa “Ako, Godly ug Responsable” (AGR) nga Youth, diin ang usa ka responsableng batan-on magrepresentar sa iyang barangay alang sa maong programa.

“Eight years old pa lang, kabalo na, kabalo na. So nung time nang nagkaroon siya ng, you know, buntis dayon. Alarming, dili? Alarming. . So hisgotan nato. Sa unang panahon kasi kanang mga problema likayan o itago lang ba. Pero di maayo. When you accept that there is a problem, you are halfway to the solution. I-confront nato kana nga mga problema, early teen pregnancy,”pasabot ni SMRP head coordinator Santos ngadto sa mga pastor coordinators ug mga batan-on gikan sa Tagum ug Panabo City labot sa nagdaghan nga problema sa teenage pregnancy atol sa ikaupat nga batch sa SMRP congress didto sa Bulwagan ng Lalawigan, Myerkoles, Disyembre 13.

Ang drug addiction usa sab sa mga problema nga gihisgotan sa SMRP.

“Drug abuse. . Daghang mga adik sa marijuana, nine years old gihapon. Noong giinterbyu ang usa ka bata ang tubag niya: Syempre naman mo-bright daw siya pag naka-marijuana. . And then ang baon ipampalit ng marijuana. Pag wala na’y baon, tagaan daan siya ng marijuana. Ang next week niya na baon, bayad. Kaproblema. Not only marijuana, solvent, rugby pati gani vulca seal sa bubong,” dugang pahayag ni Santos labot sa mga topiko nga pagahisgotan.

Niadtong Lunes, Disyembre 11, kusganong gipasiugda ni Gobernador Anthony del Rosario ang kahinungdanon nga tudloan gayod sa mga ginikanan ang ilang batan-ong anak labot sa sekso ug pagsanay (sex and reproduction) aron mahatagan sa hustong edukasyon. 

“Usa sa mga dakong hagit nga ginaatubang sa atong mga batan-on karon mao ang teenage pregnancy. Nasuta nga ang pagdaghan sa mga batan-ong buntis gumikan kini sa cellphone ug social media ug apil niini ang walay pagpakabana sa mga batan-on sa saktong moralidad. . It’s true, but I think more importantly is the family environment. .Who among you have discussed sex and reproduction to your children? . .Definitely it’s a difficult thing to do but you have to do it, it’s part of being a parent, one of the hurdles that you overcome as a parent,” pasiugda ni Gob Anthony ngadto sa mga ginikanan.

Ang BEST PEOPLE development agenda ni Gobernador Anthony del Rosario nagtuyo sa paglakip sa SMRP aron mahulma ang mga batan-on alang sa maayong pamatasan nga magamit kung sila na usab ang mahimong mga lideres sa sunod nga mga panahon.