Sulayan sa Davao del Norte Provincial Agriculture Office (PAGRO) ang pagtanom sa humay katulo ka beses sa usa ka tuig sugod karong hinapos nga bahin sa bulan sa Septyembre 2017.

Ingong agrikultural nga probinsya, padayong nangita ug andam mosagop sa modernong pamaagi sa pagpanguma sa humay ang administrasyon ni Gobernador Anthony del Rosario pinaagi sa PAGRO aron modako ang kita sa mga mag-uuma ug makab-ot ang 100% rice sufficiency sa Davao del Norte.

Ilawom sa BEST PEOPLE development agenda sa administrasyong del Rosario (unang “E” nga nagkahulogan ug Enhanced Agri-Aquaculture), ang mapinadayonon nga mga training ug seminar gipahitabo matag karon ug unya sanglit nagkabag-o sab ang teknolohiya sa panguma ilabina sa humay.  

“Although wa pa ta matawo naa nang humay, kailangan nato magtuki-tuki ta para sa atoang damgo nga motaas gyod ang atong abot ug atong mapakaon ang atoang katawhan dire sa probinsya ingon man sa tibuok Pilipinas. Akong na-estorya didto sa Asuncion nga naa ta’y 3rd cropping trial,” pasabot ni PAGRO department head Dr. Anastacia Notarte sa mga rice farmers-cooperators atol sa Hybrid Rice Technology Demo Field Day nga gihimo Byernes, Septyembre 15 didto sa New Visayas, Sto. Tomas.

Ang pag-gamay sab sa luna nga gitamnan ug humay nga kanhi 12 milyones ektaryas sa tibuok nasod ngadto na lamang sa 4 milyones ektaryas tungod sa industrialisasyon ug ang padayong pagdaghan sa populasyon maoy balidong mga rason nga nangita ug bag-ong mga pamaagi ang Department of Agriculture.

“Ang atong trial sa 3rd cropping season magsugod na siya sa last week of September didto sa New Corella. . . Ngano man nga ato nang pagahimoon? . . Kung dili ta mohimo ug laing intervention to have another cropping season. . . moabot gyod ang panahon . . .maglisod na gyod tag pakaon sa atoang katawhan. Samtang dili pa na moabot kita, kita sa Department of Agriculture together with the rice farmers maghimo na ta ug pagtuki-tuki kung kaya ba, appropriate ba ang third cropping season,” dugang pasabot sa PAGRO head nga nagbutyag nga karong Martes Septyembre 19, dalhon na sa DA R-XI ang semilya ug abono para sa third cropping season.

Gipasaligan sab sa babayeng agrikulturista ang mga rice farmers-cooperators nga dili sila mabalaka labot sa patubig sanglit aduna na’y gihimo nga kasabotan tali sa National Irrigation Administration (NIA), pagdumala sa peste, binhi, abono ug ubang problema sanglit i-monitor gayod pag-ayo sa PAGRO ang himoong third cropping sa humay diha sa unang 15-ektaryas nga luna didto sa New Corella. Kung molampos ang pagtanom sa tulo ka higayon sulod sa usa ka tuig, ipasundog kini sa tibuok Davao del Norte. 

Sa himoong third cropping trial, pulos hybrid nga variety sa humay ang itanom nga moabot lamang ug 110 ka adlaw paubos dayon maani na. Daghan nang mga mag-uuma sa mga lungsod sa Braulio E. Dujali, Sto. Tomas, Asuncion ug New Corella ang misagop sa hybrid nga variety.

DavNor News