Gibisita ni Panabo boxer two-time IBF Super Flyweight champion Jerwin "Pretty Boy" Ancajas ang Kapitolyo sa Davao del Norte human sa malampuson nga pagdepensa sa iyang titulo niadtong Hulyo 2, 2017 didto sa Brisbane, Australia.
Ang 26-anyos nga Panaboan boksidor nagkinahanglan lang ug pito ka rounds aron magpabiling kampeon human gi-Technical Knock Out (TKO) si Japanese challenger Teiru Kinoshita, ang mandatory challenger sa maong dibisyon.
Nagpasalamat ug dako si Ancajas sa iyang kadaugan nga nagsugod sa amateur boxing sa edad nga 11-anyos ilawom sa Barangay UNA nga programa ni DavNor District II Congressman Antonio “Tonyboy” Floirendo sa Panabo niadtong 2003.
“Dako kaayo’g katabang ang (Panabo) Amateur Boxing program kay pag-abot sa pro, ang disiplina nga gitudlo sa mga coaches sa akoa nadala nako pag pro,” pahayag ni Ancajas atol sa iyang pagbisita sa DavNor Kapitolyo nga nagpasalamat sab kay gihatagan ug importansya ang kabataan nga malayo sa mga bisyo.
Dugang gisaysay ni Ancajas kinsa gold medallist sab sa 2008 Palarong Pambansa 2008 nga mapasigarbohon kaayo siya sa pagtawag sa iyang probinsya atol sa away didto sa Australia.
“Di nako to makalimtan nga experience. Kay pag-champion nako una wa ko nailhan. . proud kaayo ko nga pagtawag pa lang sa Davao del Norte nalipay na kaayo ko pagsugod pa lang sa dula. . Lipay ko nga morag kulba, halo-halo na,” padayong saysay sa IBF Super Flyweight champion.
Nagpasalamat sab ang boxing champion sa mga supporters ilabina kang Gobernador Anthony del Rosario, kang administrator Samson Sanchez ug sa tanang taga Davao del Norte kinsa nagsige ug text ingong suporta kaniya sa iyang pagdepensa sa titulo.
Ilawom sa BEST PEOPLE development agenda sa administrasyong Anthony del Rosario, ang ikaduhang “E” (Education and Sports) nagtutok sa pagpalambo sa edukasyon ug sports ingong usa sa epektibong paagi nga malayo ang mga kabataan gikan sa daot nga bisyo ilabina sa gidili nga droga. Ang boksing maoy usa sa mga sports nga itudlo diha sa Sports Academy nga nahimutang sulod sa Davao del Norte Sports & Tourism Complex sa Kapitolyo.
Labot niadtong nangandoy nga mahimong kampeon, gipaabot ni Ancajas ang iyang mensahe.
“Way bayad ang mangandoy. Padayon kung unsa ang pangarap gusto nga maabot. Disiplina sa kaugalingon, di padala sa barkada. . dapat straight lang pirme,” pagdasig sa IBF Super Fly champion.
Si Ancajas adunay rekord nga 27-1-1 uban ang 18 ka daog pinaagi sa knockout. Siya sab ang unang world champion ilawom sa MP Promotions ni Senador Manny Pacquiao.
