Himoon nang kabahin ang kompetisyon sa Water Search And Rescue kun WASAR sa tinuig nga Rescuelympics sa Provincial Disaster Risk Reduction and Management Council.
Gisugdan karong tuiga 2017, gipahinabo ang WASAR Huwebes, Hulyo 27 didto sa Beach View, Mabini, ComVal nga giapilan sa tanang mga Disaster Responders gikan sa 10 ka Local Government Units sa Davao del Norte.
Unang mipakita sa ilang abilidad sa pag-rescue diha sa tubig ang team sa mga responders gikan sa Island Garden City of Samal (IGaCos) nga miabot ug 35:50 minutos nga gisundan sa Tagum City nga miabot sab ug 39:50 minutos dayon ang Braulio E. Dujali nga mikabat ug 41 minutos. Ning pagsulat ang ubang LGU mopakita pa sa ilang abilidad nga mahimong moabot ug sayong gabii.
Matod ni Gaspar Balinggao, ang presidente sa Provincial Alliance of Disaster Risk Reduction Responders Officers (PADIRRMO) sa Davao del Norte nga ilang gi-apil ang WASAR sa tuyo nga ma-andam ug mapauswag pa ang katakos sa mga responders diha sa tubig o dagat.
“Karon pa ni sukad naapil sa 1 DavNor Rescuelympics. . .. Ang mga responders sa kada LGU molangoy sila ug 100 meters, mo-perform sila ug knot-tying, pagkahuman alsahon nila ang rubber boat apil ang outboard motor unya mag-paddle sila sa na capsize nga lain pa nga rubber boat nga dunay 2 ka pasyente nga naglutaw-lutaw. Unya dunay 1 nga nalumos naa sa ilalom nga ilang luwason. Pagkahuman mosalom sila sa mga barriers unya moadto sila sa treatment area. Inaug tong mga pasyente unya balik sila sa starting line unya diha mahuman ang dula,” pasabot ni Balinggao sa mechanics sa kompetisyon nga angay lang mokabat ug 40 minutos uban ang pinaka ensakto nga pag-first aid.
Gawas sa tinuig nga rescuelympics, gisubli ni PDRRMC Action Officer Provincial Administrator Samson Sanchez ang “maayong balita” ngadto sa mga responders nga gustong makakuha ug kurso sa Disaster Management.
“One of the discussions namo is the finalization of a course under the Davao del Norte Learning Institute in partnership with the Davao del Norte State College, a course on Bachelor of Science in Disaster Management. . . And hopefully that will be an inspiration sa inyoha . . some of you nga wa pa katapos ug 4-year course o natapos na but still you want to have a course on disaster management. . . we will be offering that to all from the barangay level, barangay functionaries up to the provincial level, provincial employees,” pasabot sa Action Officer nga gisugat ug palakpak sa mga responders.
Ang DavNor Rescuelympics nagsilbi sab nga panahon sa panagtapok sa mga responders sa tibuok Davao del Norte nga dili panahon sa katalagman.
