Sobra 700 ka mga opisyales sa mga barangay sa Davao del Norte nga gilangkoban sa mga Kapitanes, tresurero, Committee chairmen on Appropriations ug mga Barangay Records Keepers (BRK) ang gipailawom sa 5-ka adlaw nga training/workshop labot sa financial management.

Gihimo sa tulo ka hugna ang pagbansay sugod niadtong Hulyo 10 nga mahuman karong Hulyo 28 didto sa RDR Gym sulod sa Kapitolyo sa Davao del Norte.

Matod ni Commisssion on Audit (COA) Regional XI Director Atty. Roy L. Ursal nga bisan tinuod daghan na nga mga seminar ang giagian sa mga opisyales, kinahanglanon gayod nga ipailawom na sab sila ilabina sa mga kabag-ohan sa pamaagi sa standard accounting practices.

“Naa man gud mga issuances and commission nga we felt nga angayang mahibaw-an sa barangay. Usa ani ang pag-apply sa Philippine Public Sector of Accounting Standards, PPSAS. Naay mga kabag-ohan sa accounting ug mga usual policies nga dapat mahibaw-an sa mga barangay,” pahayag sa COA Director IV Roy Ursal atol sa interbyu.

Gibutyag sab ni Atty. Ursal nga ang laing rason sa seminar/workshop mao ang plano sa COA nga ilain na gyod ang pag-awdit sa mga barangay.   

“Precisely ang pondo man gud aning barangay gitagaan ni siya’g pokus sa commission. In fact ang plano gyod eventually naa na’y separate barangay audit team nga lahi siya sa mo-awdit sa munisipyo ug sa city. Gi-propose pa na sa siya sa commission but eventually I think ing-ana na ang pormat para sa barangay,” dugang pahayag sa regional XI director sa COA.

Apan luyo sa teoriya nga mahibaloan sulod sa 5-ka adlaw nga seminar, gidasig sa COA ang mga partisipante labot sa pinaka-importante nga ilang mahimo--- ang pag-aplikar sa ilang nakat-onan aron dili mausik ang buhis sa katawhan gawas pa unya sa mga implikasyon diha kanila kung magkasayop-sayop ang ilang paghawid sa gisalig nga pondo.

DavNor News