Bisan sa ka-busy tungod sa daghang aktibidades sa ika-50 nga kasaulogan sa Davao del Norte, migahin ug panahon si Gobernador Anthony del Rosario aron moduyog sa kasub-anan sa mga nailo ni SPO1 Niño Moreño alas 11 sa buntag, Huwebes, Hunyo 29, 2017.

Kauban si Provincial Administrator Samson Sanchez, gitunol usab sa gobernador ang hinabang ngadto sa byuda na nga inahan sa namatay nga polis.

Matod ni “Nonoy” nga igsoon sa namatay, breadwinner ang 36-anyos nga polis nga wala magminyo aron maatiman ang iyang inahan. Usa usab ka sakop sa Philippine Constabulary (PC) ang kanhi amahan ni SPO1 Niño Moreño.

Kahinumduman nga niadtong Hunyo 23 sa buntag, gi-atake sa wala matinong gidaghanon sa rebeldeng NPA ang 2nd Platoon sa Davao del Norte Provincial Public Safety Company sa Barangay New Manay-Malitbog boundary sa Panabo City nga miresulta sa halos usa ka oras nga gyera. Naigo sa may tangkugo (nape) si SPO1 Niño Moreño hinungdan sa iyang kamatayon samtang tulo usab ang namatay sa bahin sa mga rebelde nga miatras tungod sa kaisog sa pagdepensa sa tropa sa gobyerno bisan kung gamay lang sila.

Nagpadala ug bulak si Presidente Rodrigo Roa Duterte nga gikatakdang mobisita sa haya sa namatay una pa kini ilubong.

Sumala sa pahibalo ang lubong himoon karong Domingo, alas 10 sa buntag, Hulyo 2, 2017 adto sa Glorious Resurrection Memorial Park.