Giawhag sa Davao del Norte Provincial Peace and Order Council nga pakusgon pa ang pag-monitor sa mga LGUs sa ilang mga barangay daplin sa dagat atol sa regular miting nga gipahinabo Myerkoles, Hunyo 7. 

Matod ni DavNor PPOC chairperson Gobernador Anthony del Rosario nga ang mga Local Government Units sa Tagum, Carmen, Panabo ug Island Garden City of Samal angayan hugtan ang pag-monitor sa mga mosulod nga mga bag-ong tao sanglit nagkadaghan ang mga bakwet (Internally Displaced Persons [IDPs]) nga migawas gikan sa kagubot sa Marawi City.

“Yung mga coastal barangay ninyo, are they providing information kung naay mga gasulod dira through the coasts?” pangutana ni Gob AGR ngadto ni Carmen Mayor Virginia Perandos, Panabo bise-mayor Janrey Gavina ug mga representante alang sa Tagum City ug IGaCoS.

Matod ni Mayor Perandos nga sa barangay Mabaus, Carmen adunay upat ka pamilyang Muslim gikan sa Marawi City ang midangop sa ilang paryente hinoon miabot kini pinaagi ug land trip ug miagi na sab sa daghang mga checkpoints una pa kini nakaabot sa ilang lugar. Desidido gihapon ang mayor nga hugtan nila ang pag-monitor.

Gitaho sab ni bise-mayor Gavina nga kasamtangan wala pa’y na-instalar nga checkpoint sa mga dapit nga daplin sa dagat sa Panabo City apan hugot karon nga ilang bantayan ang maong mga dapit.

Sa bahin sa IGaCos, matod ni Police Inspector Dizon nga wala pa sila’y na-monitor nga mga IDPs samtang gihugtan pa nila ang pagbantay sa mga daplin-dagat pinaagi sa regular nga mga pagbisita kauban ang mga personahe sa Bantay-Dagat kontra ilegal nga pangisda.

Alang sa Tagum City naghangyo sila ug tabang gikan sa maritime police aron madugangan ang ilang lokal nga pwersa nga nagbantay sa kadagatan samtang gikumpirmar nga duna sab bakwet nga miabot sa barangay San Miguel nga sa panahon sa PPOC miting, wala pa makuhai ug mga ilhanan (profiling).

Atol sa miting PPOC nagkahiusa ang mga miembro nga magpatungha ug mga hinabang aron mahatod ngadto sa mga IDPs tungod sa kagubot sa Marawi City.