Human sa napulog-duha (12) ka semana nga pagtudlo ug dugang kahibalo sa pagpadagan ug negosyo, kawhaag-usa (21) ka mga gagmay’ng ngegosyante gikan sa Tagum ug Davao City ang nagtapos sa unang batch sa Mentor-Micro Entrepreneur (Mentor ME) nga programa sa Department of Trade and Industry (DTI) XI Byernes, Hunyo 2 didto sa Big 8 Corporate Hotel.
Gawas sa lectures ang mga negosyante nga gitawag ug “mentees” gipahimo sab ug Business Improvement Plan (BIP) aron hisgotan uban sa mga “mentors” unsaon pagpalambo ug makatabang sa paghatag ug kahigayon sa panarbaho sa komunidad.
“Ang bottom line nato dire is poverty alleviation. And we can only address poverty alleviation kung kita nga mga entrepreneurs maka-provide ta ug trabaho sa mga least fortunate brothers,” Matod ni DTI Region XI Director Maria Belenda Q. Ambi.
Aron maapil sa libreng pagbansay sa Mentor ME, ang mga mentees kinahanglang nasulayan na sa ilang tagsa-tagsa ka mga negosyo nga dili momenos usa ka tuig ug makadawat sa padayon nga pag-monitor sa DTI sa pagseguro nga molambo gyod ang ilang mga negosyo.
“We will be monitoring you every now and then. Kasi gusto namo makit-an kung unsa na ang dagan sa inyong negosyo. . . It will not be a static plan nga mao lang na siya as installed. It will be a dynamic plan. . . kay business is always a challenge,” padayong pagdasig sa DTI XI direktor.
Matod ni Davao del Norte Provincial DTI Direktor Romeo Castañaga nga ang unang batch nga “migradwar” sundan sa 2nd batch nga adto himoon sa Panabo City karong Hulyo 3 ug target gihapon nila ang gidaghanon nga 25 ka gagmay’ng negosyhante sumala sa “KAPATID Angat Lahat Program” diin nailawom ang Mentor ME.
“July 3 sa Panabo. Mag-target gihapon ta ug 25. . . dili kaayo daghan, dili pod kaayo gamay. Kung naa ma’y dili ka-graduate kay naay mga absences, at least mahuman sila ug mga 20,” pasabot sa DTI probinsyal direktor sanglit libre ang training, pagkaon ug bisan sa accommodation sa mga mentees.
Sulod sa napulog duha ka semana nga pag-eskwela sa mga mentees, napulo sab ka modules labot sa pagpadagan ug negosyo ang ilang dugang nakat-onan nga magsilbing dugang puhunan aron molahutay ang ilang negosyo.
