Ilusad sa probinsyal nga kagamhanan sa Davao del Norte ang Barangay Development Academy aron gayod masangkapan sa hustong kahibalo ang mga barangay kapitanes, kagawads ug mga barangay functionaries sa tibuok probinsya.
Ang maong katikaran gipahibalo ni gobernador Anthony del Rosario atol sa unang adlaw sa Barangay Captains’ Forum kagahapon Mayo 23, 2017 didto sa Provincial Training Center sulod sa compound sa Kapitolyo.
“We are strengthening our roles of providing an enabling environment for our local government units. We need to empower and capacitate our LGUs to deliver better services to our constituents. Tungod niini pinaagi sa Davao del Norte Learning Institute, Davao del Norte State College, Center of Continuing Studies for Local Development, atong ilunsad ang Barangay Development Academy,” pahibalo ni Gobernador del Rosario atubangan sa mga kapitanes gikan sa Distrito I sa Davao del Norte.
Katuyoan sa administrasyon ni del Rosario nga mahimong mas epektibo ang paghatod sa gikinahanglang serbisyo publiko ngadto sa mga Dabaonon.
“Kini adunay tumong nga matagaan pa ug dugang kahanas ang atong mga barangay officials ug barangay functionaries mahitungod sa barangay planning, project management, fiscal administration, policy making, community development and organizing, project monitoring and evaluation, community-based resources management, tourism, education and sports development. Dapat buhaton nga mas professional ang mga barangay kapitan, barangay kagawad ug functionaries aron mahimo kamong mas takos sa pagpangalagad,” pasabot ni Gob Anthony ngadto sa 85 ka mga kapitanes nga presente.
Gawas sa pag-implementar sa mga proyekto, ang mga kapitanes ug barangay functionaries nagkinahanglan sab ug kahibalo aron makakuha ug pondo gikan sa lain-laing ahensya sa gobyerno sanglit ubay-ubay nga kinahanglanong dokumento ang i-sumiter.
“Mahatagan pa gyod kamo ug capacity building pinaagi sa Barangay Development Academy. Ang DNLI-DNSC ang mismo moadto sa inyong mga barangay para niini aron wala gyoy mahimong babag sa inyong pagtuon. Nabag-o na ang pamaagi sa pagdumala ug dinhi sa atong probinsya sa Davao del Norte gusto nato nga ang atong mga barangay ang mahimong modelo sa tibuok Pilipinas sa usa ka maayong pagdumala ug mas propesyonal nga pagpadagan sa mga barangay,” dugang pasabot sa gobernador.
Gilaoman nga niining tuiga, masugdan na ang Barangay Development Academy sanglit gitrabaho pa ang mga kinahanglanon ingon man ang mga teaching modules nga gipahaom alang sa mga lokal nga opisyales sa matag barangay.
