Dili lang pisikal nga pangandam ang gihimo sa Col. Rosalio C. Saludares Elementary School (CRCSES), Magdum, Tagum City alang sa pag-abri sa klase karong Hunyo 5, apan apil nga gipasiugda niini ang pagtabang sa mga kabataan nga maandam ang ilang ubang panginahanglan lakip na ang “Adopt-a-Pupil” program.
“Dili lang ang physical feature sa eskwelahan atong pangandaman. Labaw sa tanan, unsa man gyod ang need sa bata? Unsa man gyod ang mga kinahanglanon sa bata aside niining physical nga makita nato karon, aside nianang pagpangandam sa mga classroom sa kabataan?” kusganong pasiugda ni Ms. Amelita Sol Donayre, ang school principal ngadto sa mga boluntaryo sa Brigada Eskwela niadtong Byernes, Mayo 18.
Sa pagpasiugda sa ‘Adopt-a-Pupil’ niadtong Byernes, lakip nga nag-adopt ug mga estudyante ang pipila ka indibiduwal sama ni Ms. Amelita Doydoy, Davao del Norte Provincial Information Officer Mr. Sofonias Gabonada, 103.9 FM Charm Radio station manager Ms. Mary Labastida ug National Grid Corporation of the Philippines (NGCP) pinaagi ni Ms. Bambi Capulong. Ang mga gi-adopt nga estudyante malibre sa tanang balayronon sa eskwelahan gikan Grade I hangtod Grade VI. Apil sab nga libre nilang madawat ang ilang school uniform.
Aron gyod masuportahan ang Brigada Eskwela sa tibuok Davao del Norte, nagpagawas si Gobernador Anthony del Rosario ug Memorandum penetsahan Abril 27, 2017 ngadto sa tanang department heads nga paapilon ang 10-15 ka mga personahe sa matag departamento ingong pagpasalamat ug paglantaw utang kabubut-on sa mga kaayohan nga nadawat gikan sa eskwelahan.
Gawas sa mga personahe sa Provincial Information Office, ang mga personahe sa Provincial Legal Office sa Kapitolyo naghatag ug kahibalo labot sa balaod sa “anti-bullying,” child protection policy lakip na ang pagpahinumdom sa mga ginikanan unsa ang angay’ng buhaton pananglit mahitabo ang pang-bully.
Lakip sab nga miapil ang Local Civil Registrar sa Tagum City nga nagpadala sa iyang mga personahe aron tabangan ang mga estudyante ug mga ginikanan nga makabaton ug Birth Certificate ang mga bata nga wala pa marehistro. Lakip niini ang pagtul-id sa mga sayop sama sa ispeling sa ngalan o kaha apelyido ug gender (kasarian).
Ang City Disaster Risk Reduction Management Office (CDRRM) nag-lecture sab sa mga estudyante apil ang mga ginikanan unsa ang angay’ng buhaton ilabina kung adunay linog, sunog o ubang emerhensya nga kahimtang.
Gawas sa pinansyal ug teknikal nga tabang, ang Saludares ES nakadawat sab ug mga materyales gikan sa syudad nga kagamhanan sa Tagum.
Ang Brigada Eskwela 2017 nagdala sa tema: “Isang DepEd, isang Pamayanan, isang bayanihan para sa handa at ligtas na paaralan.”
