Ciento Otso ka mga babaye ug traynta ka mga lalaki nga sakop sa Indigenous People ang milahutay sa napulo ka bulan nga pag-eskwela ilawom sa basic literacy program (IP Alternative Learning System) gikan niadtong Marso hangtod Disyembre 2016.

Kini na ang ika-4 nga IP Learners closing exercises nga gipahinabo niadtong Martes, Abril 4 nga gipasiugdahan sa Davao del Norte PADO-Livelihood Management Development Division uban ang DavNor division sa Department of Education. Dala pa sa mga estudyanteng IP ang ilang gagmay’ng bata gikan sa Sto. Tomas, Talaingod, Kapalong ug Asuncion aron lang gyod dawaton ang sertipiko timaan sa ilang pagtapos sa 10 ka bulan nga pagbansay. Ang 138 nga mihuman maoy sakop sa tribong Ata-Manobo, Mangguangan ug Dibabawon.

Matod ni Romy Damloy, Instructional Manager (IM) nga sakop sab sa Ata-Manobo nga tribo sa Talaingod, nga sulod sa 10 ka bulan gitudloan ang mga IP sa sukaranan (basic) nga kahibalo sa pagbasa, pagsulat, ug pagkwenta. Gawas niana gitudloan sab ang mga estudyante sa pipila ka mga paagi sa panginabuhian. 

“Within 10 months . . . ang amoang ginatudlo sa ilaha kining makatuon sila unsaon pagsulat, kwenta ug pagbasa. . . Human sa pulo ka bulan, makakat-on na sila pagbasa. . Gawas niana. . adunay livelihood nga ginatudlo para sa mga estudyante,” matod ni Damloy kinsa nahimong maestro sa iyahang inahan nga estudyante.

“Ang nahibaloan nako kanang magsulat, magbasa. Pero dili pa kaayo kay tigulang na ko,” matod sa 65 anyos nga si Loriana Damloy, inahan ni Romy Damloy nga Instructional Manager sa mga IP sa Talaingod.

Gidugang ni Loriana nga sa ilang kawad-on lisod gayod kaayo ang pagpa-eskwela apan iyang gi-agwanta aron lang gyod makakuha ug taas-taas nga edukasyon ang iyang mga anak.

“Bisan tuod pobre ko sir pero akong giagwanta, mga anak nako gipa-eskwela hangtod sa college. . . Kaluoy sa Diyos nag-working na sila dire, wa na man ko’y kaya,” tinud-anay’ng pahayag sa 65-anyos estudyanteng inahan.    

Sa iyang bahin bisan kung may edad na kursonada gayod si Loriana nga moeskwela aron sab makahibalo ug “Tagalog.”

“Gusto kung makabalo ko’g Tagalog. . .Pananglitan moingon, kung binisaya, asa man ka gikan, di saan kayo galing,” mapahiyomon nga pasabot sa 65-anyos nga inahan-estudyante. 

Alang sa usa ka baldadong IP, ang iyang kahimtang wala makapugong sa pag-eskwela aron lang gyod makabalo magbalanse sa kwarta.

“Palit tag mais, kabalo ta magbalanse aron pod di ta malimo-limoan. . . ang akoa gyod . . aron kabalo pod ko mag-analyze unsaon pagbalanse unya sa dinagko nga mga kwarta,” matod ni “Bonto” nga usa ka baldadong IP. 

Gawas sa sukaranang pagbasa, pagsulat ug pagkwenta nga gipahitabo matag Lunes ug Myerkoles sa semana, sa adlaw’ng Byernes tudloan sab ang mga estudyanteng IP sa panginabuhian nga naglakip sa paghimo ug bayong, amakan, organic gardening, fashion jewelry beads making, panahi, pagluto ug bukhayo ug uban pa diin ang mga galamiton anaa ra sa ilahang komunidad.


Sa sukaranang edukasyon nga nadawat sa mga IPs, masaligon ang mga personahe sa PADO-LMDD nga andam na silang mopirma imbes mag-thumbmark sa higayon nga ilang dawaton ang mga benepisyo gikan sa 4Ps nga programa.

DavNor News