Grand Slam Kalasag awardee na ang Davao del Norte human sagunson nga midaug ang Provincial Disaster Risk Reduction Management Council (PDRRMC) gikan sa tuig 2015, 2016 ug 2017.
Gawas sa pagkahimong 2017 nga mananaug, gipahibalo sab ni Office of Civil Defense XI Regional Director ug Chairperson sa RDRRMC XI BGen Leoncio A. Cirunay, Jr. (Res) nga ang DavNor PDRRMC mao ang opisyal nga morepresentar sa Rehiyon Onse alang sa nasyonal Gawad Kalasag Search sa sulat nga penetsahan ug Abril 3, 2017 ngadto kang Gobernador Anthony del Rosario.
Ang Gawad Kalasag (KAlamidad at Sakuna LAbanan SAriling Galing ang Kaligtasan) gihatag ngadto sa mga indibiduwal, pribadong sektor, non-government organizations, government organization ug Local Disaster Coordinating Council (LDCC) sa probinsya, syudad, munisipyo o barangay tungod sa ilang talagsaong nahimo sa pagpamenos sa peligro ug kadaot hatod sa katalagman o hinimoan sa tawo nga kalamidad ingon man ang maayong pagdumala nga mapaabot ang panginahanglan ngadto sa hingtungdan may katalagman man o wala.
Gawas sa padayong pagkuha ug nunot-panahon nga kahibalo ingon man pagbaton ug mga kagamitan alang sa pagresponde, ang DavNor PDRRMC nagpatungha sa programang Oplan ANDAM (Advocacy on Natural Disaster Awareness and Management) sa pagpaalerto sa komunidad aron mamenosan ang risgo ug kadaot diha sa mga lugar nga daling mabahaan, daplin sa kabaybayonan ug bakilid nga lugar nga peligroso sa linog. Hinapos sa tuig 2016, gipalapdan pa gyod ang Oplan ANDAM ug gihimong Alliance of Grassroots Responders (AGR) nga magkobre na sa tanang 223 ka barangay sa tibuok probinsya. Gipalig-on kini pag-ayo pinaagi sa pagpaluyo ug lokal nga ordinansa.
Lakip nga gihimo sa DavNor PDRRMC ang mga programa langkit sa Climate Change Adaptation and Disaster Risk Reduction and Management (CCA-DRRM) alang sa rehabilitasyon sama sa pag-awdit sa mga imprastruktura, mapinadayonon nga pagtanom sa kahoy ug bakhaw diha sa upaw nga kabukiran ug kalamakan. Ang padayong pagbansay sa mga tig-responde (Responders) lakip na ang pagtukod sa “One DavNor Rescue” gipahigayon aron maepektibo ang tanang Responders nga motubag panahon sa katalagman.
Bisan sa wala pa ang kalamidad, ang dali maapektohan nga mga sektor sama sa mga baldado ug mga tigulang gipailawom sa pagbansay-bansay labot sa ilang angayan buhaton panahon sa katalagman ug kung unsaon sab ang pag-responde kanila. Lakip sab nga gitudlo sa DavNor PDRRMC unsaon pagtabang o pagluwas ang kababayen-an isip pag-obserbar sa gender and development nga programa. Importante sab nga gitudlo ang programang WASH (Water Sanitation & Hygiene) lakip na ang angay’ng buhaton panahon sa pagpuyo diha evacuation center nga mag-obserbar sa kahinlo ug sanitasyon.
