Sa padayong paghatod sa maayong serbisyo, laing pasidungog na sab ang nadawat sa probinsyal nga panggamhanan sa Davao del Norte labot sa pag-implementar sa Provincial Road Management Facility (PRMF).
Gidawat ni Gobernador Anthony del Rosario ang pasidungog gikan kang Direktor Maria Lourdes Lim, chairperson sa RPMC XI atol sa unang Quarterly Meeting sa Regional Development Council XI niadtong Myerkoles, Marso 8, 2017.
Ang PRMF maoy programa nga gisuportahan saAustralian Aid for International Development (AusAID) alang sa pag-atiman sa probinsyal nga karsada nga mag-aplikar sa institusyonal nga mga reporma diha sa lima (5) ka bahin: 1-mapinadayonong pag-mentinar sa karsada (sustainable road maintenance), 2- bukas ug may tulubagon nga sistema sa pagdumala sa badyet ug paggasto (transparent and accountable budget and expenditure management system), 3- kasaligan nga sistema sa pag-kontrol (functional internal control system), 4- bukas nga proseso sa pagpamalit (transparent procurement process), 5- maayong pagdumala sa tawhanong kahinguhaan ug estratehiya sa ilang kalamboan (human resource management and development plan strategies).
Ang Davao del Norte maoy usa nga nakabenepisyo sa PRMF nga programa nga adunay sobra 839-kilometros gimentinar nga karsada.
Apil sa gihimong maayong implementasyon sa probinsya, niadtong hinapos sa 2015 pinaagi sa Provincial Engineering Office gisugdan niini ang Community-Based Road Maintenance Contracting ngadto sa mga People Organizations (POs). Ang Kipalili Farmer’s Association nga nagmentinar sa 6.93 kilometros nga gitas-on maoy partner alang sa “pilot testing” niini.
Tungod sa kalamposan, sa tuig 2017 dunay 16 na ka mga asosasyon ang gihimong partners sa DavNor PEO diin ang mga trabahante modawat ug “minimum” nga sweldo. Ang gihimong “partners” nga mga asosasyon maoy accredited nga mga organisasyon sa barangay nga magmentinar sa probinsyal karsada sa tulo ka bahin: paglimpyo, paghagbas sa mga sagbot nga makasalipod sa mga motorista, paglimpyo sa mga culverts aron dili ma-alihan ang tubig ug ang pagtabon sa mga lubak.
Matod ni Direktor Lourdes Lim, ubos sa governance sector, ang Davao del Norte gipili tungod sa maayong pag-implementar sa mga proyekto niini. Kini nakakuha ug katibuk-ang 90.20% nga grado sa iyang pagdumala.
“To highlight exemplary practices in program and project implementation . . . the Council approve the conferment of the calendar year 2016 Davao Region Excellence Awards in Project Implementation to the Provincial Government of Davao del Norte whose entry is on the Provincial Road Management Facility (PRMF) for governance sector,” pahayag ni Direktor Lim.
Apil usab nga gipasidunggan ang Department of Science and Technology XI (DOST) ubos sa economic sector tungod sa maayong pag-implementar sa Food Processing Innovation Center ingong technology hub nga anaa nahimutang sa Davao City.
Photo Courtesy of Lord Apique: Gidawat ni Gobernador Anthony del Rosario ang Davao Region Excellence Award in Project Implementation alang sa Davao del Norte tungod sa maayong pagkadumala sa Provincial Road Management Facility (PRMF) nga programa. Apil usab ang DOST XI pinaagi ni Regional Director Sales nga gipasidunggan atol sa unang Quarterly Meeting sa RDC XI, Myerkoles, Marso 8, 2017.
