Subay sa direksyon sa probinsyal nga panggamhanan nga mahimong “AMA” (Abilidad at Malasakit) ngadto sa iyang mga ginsakpan, gisugdan na ug apod-apod pinaagi sa Provincial Agriculture Office (PAGRO) ang libreng abono ug binhi ngadto sa mga mag-uuma sa tibuok probinsya Lunes, Pebrero 13, 2017.
Kini aron matabangan nga makabarog ang mag-uumang Dabaonon sa hagit sa nagkausab-usab nga klima.
Unang midawat ug 320 ka sako nga complete fertilizer (14-14-14) ug 36 ka sako nga Ammonium Sulphate (21-0-0) ang 153 ka mga mag-uuma sa saging, humay, cacao, durian ug ubang prutas gikan sa Tagum City ilabina kadtong mga umahan nga nakaagom sa hataas nga hulaw sa miaging tuig.
“Kining atong mga ayuda nga gipanghatag dili lang ni para sa Tagum. After ani moadto pami ug Carmen kay daghan man pod naapektahan sa El Niño, sama ninyo sa tibuok probinsya. Kamo gyod ang primero namo giadtoan para matunol na gyod ni kay mao man gyod na ang role namo dinhi sa provincial capitol nga mosuporta sa atong mga local government units apil na of course ang Tagum City,” matod ni Gobernador Anthony del Rosario.
Misaad usab ang gobernador nga aduna sab madawat ang mga mag-uuma nga nahimong biktima sa di pa lang dugay milabay nga baha.
Samtang didto sa lungsod sa Carmen, 70 ka mga sako nga complete fertilizer ug 67 ka sako nga Ammonium sulphate ang gitunol sa probinsya ngadto sa mga mag-uuma. Gawas sa abono, mihatag sab ang Regional Office sa Department of Agriculture ug 493 ka sako nga binhi.
Ang sobra 1,100 ektaryas nga kahumayan sa Carmen mao ang nakaagom ug dakong kadaot samtang sopbra 20 ektaryas nga gulayan ang nauga tungod sa hulaw sa miaging tuig ug gilunopan sab sa baha sa miaging bulan sa Enero.
Karong adlawa, makadawat sab ug hinabang abono ug mga binhi ang mga mag-uuma sa lungsod sa Talaingod pagka buntag samtang ang Island Garden City of Samal mao na usab ang tunolan sa hinabang pagka hapon.
Pagka Huwebes (Pebrero 16), ang lungsod sa San isidro, Sto. Tomas ug Braulio E. Dujali mao ang mga lungsod nga hatdan sa hinabang pang-agrikultura.
Sa adlaw’ng Byernes (Pebrero 17) ang mga lungsod sa Asuncion, New Corella, Kapalong, ug Panabo City ang gikatakdang modawat sa hinabang gikan sa probinsyal nga kagamhanan.
