Gidayeg ni Agriculture Secretary Immanuel Piñol ang plano ni Governor Anthony del Rosario nga i-enroll sa Philippine Crop Insurance Corporation (PCIC) ang tanang umahan sa Davao del Norte nga apektado sa baha.

Si Piñol nakigpulong sa mga opisyales ug mag-uuma sa mga lugar sa Rehiyon Onse ug Rehiyon Trese nga naigo sa pagbaha didto sa Kapitolyo sa Compostela Valley adlaw Huwebes, Enero 26, 2017.

Gibutyag ni Gov. AGR sa maong tigom ang programa sa Davao del Norte nga naghatag sa crop insurance ngadto sa mga humayan sa probinsya.

 Gipahibalo sab sa gobernadora ang iyang plano sa pagpalapad sa maong programa aron iapil sa PCIC ang tanang mga umahan nga apektado sa pagbaha.

 “Congratulations. I admire the initiative. Dapat LGU ang mag-lead,” tubag sa Secretary, dungan pasalig nga iyang tan-awon ang pwedeng matabang sa iyang departamento alang sa maong programa sa lalawigan.

 Atul sa maong meeting, gipasalig sab ni Secretary Piñol nga iyang ihatag ang gihangyo sa mga probinsya sa Davao Region isip recovery budget mga mokabat ngadto sa P69,237,680 human ma-validate kini.

 Nagtinguha kini aron tabangan ang mga mag-uuma sa pagbawi sa danyos ug pagbangon gikan sa dakong pagbaha human ang pila ka semana nga pag-ulan.

 Pinakadako ang gipangayo nga recovery budget sa Davao del Norte sa kantidad nga P39,393,260.

 Ang probinsya ang nakaagom sa pinakadako nga kadaot kon danyos sa agrikultura nga mokabat ngadto sa P29.8 milyones.

Butyag ni del Rosario sa media nga iyang gisugo ang iyang provincial planning officer og agriculturist nga ilang susihon pag-ayo ang mga agricultural areas nga pirming maigo sa pagbaha aron ma-enrol tanan ilawom sa PCIC.

 Saysay sa gobernador nga sa pagkakaron ang mga humayan lang ang naka-enroll sa PCIC.

 Apan, nasayran nga daghang hektarya sa kamaisan, gulayan ug ubang high-value crops ang naigo sab sa pagbaha.

 “Dapat maapil sab sila sa PCIC, para kung adunay sama niini nga kalamidad, naa jud silay madawat nga insurance,” sulti sa gobernador.

 Kahinumduman  nga ang Davao del Norte ang pinaka-unang lalawigan sa Mindanao ang mi-enrol sa iyang mga humayan.

 Migahin si kanhi Gov. Rodolfo del Rosario og P1.34 milyones aron ma-insure ang 2000 ka hectarya sa humayan aron depensa sa kalamidad, peste, ug sakit-sakit sa mga pananum.

DavNor News