Subay sa direksyon sa administrasyon nga makahatod ug mapinadayonon nga kaayohan ngadto sa katawhang Dabaonon, gilusad sa Davao del Norte Provincial Agriculture Office (PAGRO) niadtong Lunes, Enero 23 “Ang Gulayan Revolution” nga i-patuman diha sa tanang 223 ka barangay sa probinsya.
Matod ni Provincial Agriculturist Dr. Anastacia Notarte, nga Ang Gulayan Revolution kun “AGR” gituyo aron matubag ang malnutrisyon hangtod na sa mga barangay; usa ka programa nga gipanghingusgan sa B.E.S.T. P.E.O.P.L.E. development thrust ubos sa administrasyon ni Gobernador Anthony del Rosario.
“Ang Gulayan Revolution usa ni siya ka bag-o nga proyekto ni Governor aron ma-adres nato ang malnutrisyon dili lang sa lungsod kundili hangtod gyod sa atong kabarangayan. Isa ni siya ka programa nga gihingusgan gyod sa atong BEST PEOPLE development thrust particularly on optimum health and social services. Isa ni siya ka top priority,” pasabot sa provincial agriculturist sa bag-ong programa nga magpakusog sa gisugdan na nga Gulayan sa Barangay ug mag-komplemento sa Gulayan sa Paaralan nga programa sa DepEd.
Dugang ni Dr. Notarte nga ang tanang 223 ka barangay sa tibuok probinsya kinahanglan gayod nga maggahin ug luna alang sa gulayan ug kinahanglan sab nga mo-tambong sa mga pagbansay-bansay nga himoon.
“Yah, required gyod siya. . . After ini karon sa atong orientation naa ta’y pagahimoon nga technology training. Atong gi-require ang 223 ka committee on agriculture nga mo-attend gyod ani nga training. This is a technical training para estudyohan na gyod nila ang paghimo sa organic gardening. Kay ang gusto gyod sa atong gobernador nga ma-minimize gyod ang paggamit sa pestesidyo,” dugang pasabot sa babaeng agrikulturista sa Davao del Norte.
Labot sa mga barangay nga dili motuman, gipasabot ni Notarte nga ang provincial nga kagamhanan na ang mag-paigo.
“I think this is a mandatory project nga i-required gyod sa atong mga barangay captains para gyod makatabang didto sa ilahang mga constituents. . . Kung molambo gyod ni atong i-require na pod ang purok to purok,” ang iyang dugang pahayag.
Gibutyag sab ni Dr. Notarte nga sa pagkakaron ila nang gihan-ay ang sistema sa pagbaligya pinaagi sa pakig negosasyon sa grupo sa mga mamaligyaay ug gulay sa Tagum City pananglit modaghan na gyod ang ilang produkto. Bisan ang sakyanan nga mohakot sa ilang mga produkto giplastar na sab.
Agi ug insentibo sa ilang mga kahago, gisugdan dayon sa Ang Gulayan Revolution ang pa-contest nga adunay project-based nga premyo nga tig P100,000; 80,000; 60,000; 40,000 ug 20,000 alang sa nag-unang lima ka mga barangay sa Distrito I ug II sa probinsya.
