Modeklarar ug State of Calamity ang Davao del Norte gumikan sa pagbaha sa unom ka munisipyo ug duha ka syudad sa probinsya tungod sa padayong pag-ulan.

Sa espesyal nga miting nga gipahigayon sa Provincial Disaster Risk Reduction Management Council (PDRRMC) karon, Martes, Enero 24, ang usa ka resolusyon gipasar nga nagbutang sa tibuok probinsya ubos sa State of Calamity nga kahimtang.

Sa pagpakanaog sa maong resolusyon, gibasehan sa PDRRMC ang RA 8185 human ang mga LGUs sa Asuncion ug Carmen mideklarar ug State of Calamity. Una nang mideklarar ang lungsod sa Kapalong nga kaupat ka higayon na nga nalunopan ning sayong bulan sa Enero samtang ang syudad sa Tagum ning panahon sa pagsulat padayon pa nga naghisgot sa kadaot nga naagoman.

Sa inisyal nga report sa PDRRMC, ang baha nagpahinabo ug kadaot nga mokabat ug P299 milyones ug nag-apektar sab sa 21,245 ka pamilya o 40,335 ka mga indibiduwal sa 69 ka mga barangay. P285.6 milyones ang nadaot nga imprastruktura, P11.2M sa mga tanom ug P1.2M nga kantidad sa kahayopan ug P.85M ang kadaot sa mga pangisdaan.

Ang pagdahili sa yuta nakadaot sab sa mga karsada didto sa mga lungsod sa New Corella ug San Isidro.

Giawhag ni Gobernador Anthony del Rosario ang Sangguniang Panlalawigan nga mohimo dayon ug espeyal nga panagtagbo aron mahisgotan ang gikinahanglang lokal nga balaodnon.

“The sooner they are able to do that, the better,” matod sa gobernador.

Ang ubang mga LGUs nga apektado sa baha naglakip sa Braulio E. Dujali, New Corella, Sto. Tomas ug Panabo City.

Giduso sab sa PDRRMC ang paggamit sa Quick Response Fund sa probinsya nga nagkantidad ug P34.6 milyones aron matubag dayon ang gikinahanglang tabang, rehabilitasyon ug serbisyo ngadto sa apektadong mga komunidad.

Intro Image: Provincial Disaster Risk Reduction Management Council Special Meeting

Full Article Image: Brgy. Maniki, Kapalong