Alegre nga gisaulog ug gisalmotan sa mga senior citizen ang nagkadaiyang kompetisyon alang sa Elderly Filipino Week 2026 nga gipahigayon sa DavNor Gym, DNSTC, Barangay Mankilam, Tagum City, niadtong Oktubre 20.
Sentro sa selebrasyon ang temang, “Nakatatandang Pilipino: May Halaga at Karapatan, May Boses at Ambag sa Bayan,” nga nagpasiugda sa bili, katungod, tingog, ug kontribusyon sa mga tigulang sa kalamboan sa nasud.
Gidumala sa Provincial Social Welfare and Development Office (PSWDO) ang kalihokan, sa pakigtambayayong sa Davao del Norte Association of Senior Citizens Office (DANASCO), ug uban pang ahensiya.
Nagpakita sa ilang mga talento ug kahanas ang mga senior citizen pinaagi sa nagkadaiyang kompetisyon, lakip ang ballroom dancing, group dance, chess, dama, ug uban pang sociocultural nga kalihokan.
Gihatagan usab sila og oportunidad nga makapahimulos sa mga serbisyong panglawas, lakip ang PhilHealth YAKAP membership registration ug Maintenance Medicine Assistance Program.
Gipadayag ni DANASCO Provincial Federation President Leonardo Mendoza ang iyang pasalamat sa padayong suporta sa probinsyal nga panggamhanan alang sa kaayohan sa mga senior citizen.
Sa pikas bahin, naghatag usab og mensahe ang mga representante nila ni Gobernador Edwin I. Jubahib ug Bise Gobernador Clarice T. Jubahib aron ipahayag ang ilang suporta ug pagdasig sa mga elders.
Gipangulohan ni PSWDO Head Rosalinda Rapista ang pagdumala sa tibuok adlaw nga kalihokan. Pinaagi sa maong selebrasyon, gipasiugda sa probinsyal nga panggamhanan ang kamahinungdanon sa pag-ila ug paghatag og bili sa mga senior citizen, lakip ang ilang mga katungod ug dakong kontribusyon sa pagpalambo sa pamilya ug komunidad.
Writer: Lorna TripoliPhotos: Bembem Ulay



