Gipuno og pagdayeg ang inisyatiba sa paglusad sa K9 Narcotics Detection Dog (NDD) Border Interdiction Substations sa probinsiya sa Davao del Norte, sa pagsaulog sa pinakauna nga anibersaryo niini karong adlawa, Oktubre 6, 2026.

Gipadayag kini mismo ni Philippine Drug Enforcement Agency (PDEA) Region XI Director Atty. Benjamin Gaspi, kinsa midala mismo sa balita nga gipirmahan na ni PDEA Director General Undersecretary Isagani Nerez ang sertipiko sa rehistrasyon sa NDD Facility sa Davao del Norte.

Sa iyang mensahe, gibutyag ni Gaspi nga dako ang natabang sa maong pasilidad sa ilang padayon nga pakigbisog sa ilegal nga droga ug sa pagsiguro sa kaluwasan sa katawhan. Gihatagan usab niya og kabug-aton ang epektibo nga pagpangulo ni Governor Edwin "Kuya Gob" Jubahib isip nagpaluyo sa kalampusan niini.

Kahinumdoman nga ang probinsiyal nga panggamhanan sa Davao del Norte lamang ang nag-inusara nga LGU sa tibuok Pilipinas nga maoy mipalit mismo sa mga K9 dogs aron matabangan ang kapulisan sa pagsumpo sa kriminalidad sa tibuok probinsiya. Gi-ebalwar na usab sa PDEA ang 10 ka K9 dogs karong tuiga bag-o pa man kini gi-deploy sa lainlaing anti-drug operations sa Davao del Norte.

Matud pa ni RD Gaspi, dili lamang ang probinsiya sa Davao del Norte ang nakapahimulos niini, apan lakip na usab ang tibuok Davao Region. Gipaabot usab niya ang iyang pagpasalamat kay Governor Jubahib tungod sa iyang inisyatiba sa paglusad sa maong pasilidad.

Gisabay usab sa maong selebrasyon ang pagpahigayon sa 4th Quarter Meeting sa Provincial Anti-Drug Abuse Council, kung asa gihisgotan ang mga report gikan sa nagkalainlaing task force, komitiba, ug mga law enforcement agencies.

 

 

 

DavNor News