Duha ka mahinungdanong kalihokan ang gi-partisiparan ni Governor Edwin “Kuya Gob” Jubahib, alang sa iyang official business trip sa Manila karong semanaha.
Una, personal nga gitubag ni Kuya Gob ang mga pangutana alang sa Final Judging and Interview para sa pagpili sa 2026 Most Business-Friendly LGU Awards - Provincial Level nga gipahigayon sa Philippine Chamber of Commerce and Industry (PCCI) Office sa Taguig City niadtong Setyembre 23. Kahinumdoman nga giila ang probinsiya sa Davao del Norte isip usa sa 5 ka mga probinsiya nga gipilian sa tibuok nasud, ug kini lamang ang napili nga nanggikan sa Mindanao.
Sa maong interbyu sa PCCI, madasigon nga gipresenta sa gobernador ang mga lakang, kalampusan, ug mga inisyatiba nga gimugna sa iyang administrasyon aron masustenar ug mapauswag pa ang ekonomiya sa Davao del Norte. Giubanan siya ni kanhi Provincial Administrator Engr. Josie Jean Rabanoz, Provincial Planning and Development Coordinator Engr. Maria Hazel Zafra, ug mga personahe gikan sa Davao del Norte Investment and Promotion Center (DNIPC) nga sila Joevy Miedes ug Emm Pilegro.
Sa laing bahin, misalmot pag usab si Kuya Gob sa gipahigayon nga Regional-National Investment Programming (RNIP) Dialogue niadtong Setyembre 24 sa Philippine International Convention Center (PICC) sa Pasay City, isip katumanan sa iyang tahas isip Chairperson sa Regional Development Council XI.
Gihisgutan sa maong dayalogo ang pagpalig-on sa mga plano alang sa kalamboan sa mga rehiyon nga adunay koneksyon sa pagpangandam alang sa FY 2028 National Budget.
Isip kasamtangang nangulo sa RDC XI, gipasiugda ni Jubahib ang mga prayoridad nga mga programa alang sa kalamboan sa Davao Region, ug gipaluyohan ang mga proyekto nga misuporta sa inklusibo ug paspas nga pagpauswag sa progreso sa tibuok rehiyon.
Mihatag usab kini og higayon aron sa pagpalig-on sa panag-uban sa rehiyonal ug nasudnong panggobyerno alang sa epektibong pagpatuman sa mga programa ug pamuhunan alang sa katawhan sa Davao Region.
Ang maong mga partisipasyon sa gobernador sa maong mga nasudnon nga aktibidades pipila lamang sa mga pagpaningkamot sa iyang administrasyon sa pagtanyag og malungtarong serbisyo ug kalamboan alang sa katawhan.
