Gipalig-on sa Provincial Government of Davao del Norte ang kaandam sa mga empleyado sa Kapitolyo pinaagi sa pagbansay kanila sa disaster preparedness ug pag-amuma sa kinaiyahan.

Lakip sa mga kalihokan ang Basic Rescue Knots and Knot-Tying Techniques, ingon man ang Map and Compass Reading and Basic Navigation, aron mas mapalambo ang praktikal nga kahibalo sa mga empleyado panahon sa emerhensya ug kalamidad.

Matud ni Provincial Administrator Atty. Ralph Dela Cruz, importante nga maandam ang mga kawani tungod nakaamgo na sila sa kalisod nga dala sa mga kalamidad.

“Kitang tanan are living witnesses on how hard, how difficult it is kung maigo ta og disaster… That’s why from the provincial government, we want to instill ang atuang resilience, ang atuang preparedness for any eventuality,” matud ni Dela Cruz.

Samtang, kabahin sa panagtapok ang Environmental Awareness Day diin gipahitabo ang “May Bigas Din sa Basura” Program, usa ka inisyatibo nga nag-awhag sa hustong paglabay ug pag-recycle sa basura pinaagi sa pagbaylo og usa ka kilo nga plastic bottles alang sa usa ka kilo nga bugas.

Gipasabot ni Provincial Human Resource Management Officer Edwin Palero nga ang mga programa gitumong sa pagpalambo sa mga capitol employees, dili lamang isip mga empleyado sa gobyerno, kondili isip mga alagad sa katawhan.

“Kung aduna kitay mga programa sa Human Resource Management nga atuang gina-implement, akuang hangyo sa inyuha nga you take it by heart. Dili lang na siya gihimo nga way rason. Ang dulo ana, ikaw ug ang katawhan nga atuang giserbisyuhan,” matud ni Palero.

Kabahin kini sa prayoridad sa administrasyon ni Governor Edwin “Kuya Gob” Jubahib nga mao ang padayong pagpalambo sa mga trabahante sa gobyerno aron mas epektibo sa paghatag og serbisyo sa katawhang Dabaonon.