Gisugdan na ang diskusyon alang sa establisasyon sa Mindanao Tourism Circuit Framework pinaagi sa pagpahitabo sa pinakauna nga Organizational Meeting sa Ad Hoc Committee alang niini, sa pagpangulo ni Regional Development Council XI Chairperson ug Governor Edwin “Kuya Gob” Jubahib”, niadtong Setyembre 15, 2026.

Ang gisugyot nga Mindanao Tourism Circuit gilauman nga muhimo og usa ka sistema nga makapahapsay sa lihok sa mga turista sa tibuok isla pinaagi sa paghimo og mga hamugaway nga tourism routes ug pagkonekta sa mga mapares nga destinasyon. Tumong usab niini ang pagpasiugda sa koordinado nga pagpamuhunan ug pagsuporta sa inklusibong kalamboan sa turismo.

Isip kasamtangang Chairperson sa RDC XI ug miyembro sa Regional Development Committee - Mindanao Area Committee (RDCom-MAC), si Governor Jubahib ang nangulo sa Ad Hoc Committee alang sa maong inisyatiba, subay sa policy direction gumikan sa ika-42 RDCom-MAC Conference niadtong Marso 27, 2026.

Sulti ni Jubahib, ang maong inisyatiba importante aron sa paghatag og mas hiniusa ug lingaw nga kasinatian alang sa mga turista sa tibuok Mindanao. Gihimok usab niya ang mga miyembro sa maong komite sa pagsuhid sa tibuok nga potensyal sa isla isip usa ka estratehikong ganghaan sa turismo sulod sa Asia-Pacific region.

Gitahasan ang maong komitiba sa pagmugna sa Mindanao Tourism Circuit Framework and Implementation Strategy (MTC-FIS), nga gitakdang ipresentar ni Jubahib ngadto sa uban pang mga development councils atol sa sunod nga panagtapok sa RDCom-MAC.