Padayong nagpalambo sa ilang panginabuhian ang mga benepisyaryo sa Kawsa sa Agrikultura ug Panginabuhian sa Barangay o KAAGAPAY pinaagi sa pagdumala sa mga proyekto sa manokan ug itikan sa Tagum City.
Lakip niini ang Bagong Silang Kaagapay Association sa Barangay Pagsabangan, nga nagpadayon sa pag-atiman sa ilang egg-laying project.
Gipangulohan ni Association President Vicente Vinloan, ang grupo nakadawat og 48 ka chicken layers niadtong Enero 2026 isip dugang nga panginabuhian human sila unang nakabenepisyo sa free-range chicken project ubos sa KAAGAPAY Program ni Governor Edwin I. Jubahib ug Vice Governor Clarice Jubahib.
Matud ni Vinloan, dakog tabang sa ilang asosasyon ang chicken layers ug napulo ka sakong feeds tungod kay nakahatag na kini og kita pinaagi sa pagpangitlog. Sa pagkakaron, nakakuha sila og labing menos 42 ka itlog matag adlaw.
Gisaysay usab ni Vinloan nga gikan sa 100 ka free-range chicken nga ilang nadawat kaniadto, nagpabilin sila og 22 ka manok aron ipadayon ang breeding ug pagpamuhi. Gipa-itlog usab nila ang uban ug nakabaligya og piso ingon man itlog.
Samtang, sa Barangay San Miguel, ang mga miyembro sa Farm and Vegetable Kaagapay Association mipili usab sa pagbalhin gikan sa pagpamuhi og free-range chicken ngadto sa pag-atiman og itik tungod sa ilang obserbasyon nga mas paspas ang breeding sa mga itik.
Matud ni Vice President Engr. Jimmy Louie Sipin, aduna silay 120 ka itik nga nangitlog og labing menos 75 ka itlog kada adlaw. Nakapamuhi na usab sila og 100 ka piso ug nakadugang sa ilang kita pinaagi sa pagbaligya sa balut.
Gipadayon sa asosasyon ang pagpalambo sa ilang itikan pinaagi sa pagdugang sa gidaghanon sa mga itik.
Gipasalamatan sa mga benepisyaryo ang gobernador tungod sa padayong suporta niini sa KAAGAPAY Program, nga ilang giila nga dakong tabang sa pagsugod ug pagpalambo sa ilang panginabuhian, usa na niini si Mary Ann A. Yong, Presidente sa maong asosasyon.
Tumong sa KAAGAPAY Program nga matag pamilya makabaton og lig-on nga panginabuhian, seguridad sa panginabuhi ug episyenteng tinubdan sa pagkaon alang sa probinsya.
