Gipalig-on sa Probinsyal nga Panggamhanan sa Davao del Norte ang teamwork, komunikasyon, ug maayong relasyon sa trabaho sa mga kawani pinaagi sa duha ka adlaw nga Building an Effective Work Team (BEWT) Seminar, Agosto 18 ug 19, sa DDNSTC Pavilion, Mankilam, Tagum City.
Kini inisyatiba sa Provincial Human Resources Management Office (PHRMO) aron palamboon ang abilidad sa mga empleyado sa pagtrabaho isip usa ka team, pagdumala sa dili pagsinabtanay, ug pagtukod og mas maayong relasyon sa trabahoan. Nagpaabot usab si Governor Edwin I. Jubahib sa iyang suporta pinaagi sa iyang representante nga si Private Secretary Cyril Alba.
Nanguna sa mga diskusyon sila Ira P. Hierro ug Medilin C. Cui, parehong Senior Human Resource Specialists sa Civil Service Commission Regional Office XI. Gipunting ni Hierro nga tungod sa nagkalainlaing personalidad, talent, ug abilidad sa mga empleyado, importante nga magkahiusa sila aron makab-ot ang tumong sa ilang opisina.
“For us to be able to achieve our goals po, kailangan gyud ta magwork as a team. Dili pwede nga kanya-kanya or else ang atong mga goals would probably be unsuccessful,” matud ni Hierro.
Gihisgutan usab sa seminar ang team cohesiveness ug conflict resolution, ilabina kon unsaon pag-atubang sa dili pagsinabtanay nga mahimong motumaw sa trabaho. Sumala ni Hierro, ang lig-on nga teamwork makatabang dili lamang sa pagkab-ot sa organizational goals, kondili sa paghimo usab og positive work environment, job satisfaction ug pagminus sa conflict sulod sa team.
Gitutokan usab ni Cui ang improving workplace relationship ug conflict management, lakip ang mga hinungdan sa panagbangi ug mga pamatasan nga mahimong usbon aron malikayan nga modako ang problema.
“Hopefully by the end of our sessions… maka-learn ug mas ma-enhance ang ilang knowledge and skills on how to go about resolving conflict,” ingon ni Cui.
Pinaagi sa mga diskusyon ug team activities sulod sa duha ka adlaw, gilauman nga madala sa mga partisipante balik sa ilang tagsa-tagsa ka opisina ang ilang nakat-onan sa pagtinabangay, pagdumala sa conflict ug pagpalambo sa relasyon sa trabaho.
Writer: Jun Rey Villanueva