Anaa sa ₱4.3 milyon ang gituyo nga pondo karong tuiga sa probinsiya sa Davao del Norte alang sa pagpalig-on sa K9 Narcotics Detection Dogs o NDD Project, ilabina sa seguridad sa mga border ug anti-illegal drug operations.
Gipasigarbo sa DavNor ang maong proyekto atol sa 3rd Quarter Regional Inter-Agency Committee on Anti-Illegal Drugs Coordinating Group o RICG-XI nga gipahigayon karong adlawa, Agosto 19.
Matod ni Provincial Administrator Atty. Ralph Dela Cruz, kinsa mirepresenta kang Governor Edwin “Kuya Gob” Jubahib, 11 ka entry ug exit points ang giila sa mga border sa Davao del Norte.
Gikan sa ₱4.3 milyon nga pondo, upat ka Border Interdiction Substation ang itukod sa Sawata, Santo Tomas, Talaingod ug Tagum City, aron mapakusog ang checkpoint operations ug anti-illegal drug efforts sa probinsiya.
Gawas sa K9 NDD Project, giasoy usab sa probinsiya ang ₱10M 3-storey Balay Silangan building, nga anaa na sa ikalimang hugna sa full construction ug gipondohan ubos sa POPS Anti-Criminality Lawlessness Project.
Mihatag sab og mga update ang nagkalain-laing probinsiya ug national government agencies labot sa ilang mga lakang kontra illegal nga droga.
Tumong sa maong regional meeting, kinsa gipangunahan ni RICG-XI Chairperson, Atty. Benjamin Gaspi, nga masiguro nga ang mga anti-illegal drug campaign sa mga lokal nga panggamhanan nahisubay sa mandato ug mga programa sa Philippine Drug Enforcement Agency o PDEA.
