Gihatagan og tag-₱20,000 nga educational assistance ang 60 ka mga estudyante gikan sa nagkadaiyang tulunghaan sa Davao del Norte ubos sa hiniusang suporta sa Probinsyal nga Pangagamhanan sa Davao del Norte ug Office of the Presidential Adviser on Peace and Reconciliation and Unity (OPAPRU).

Ang mga benepisyaryo, mga anak sa mga Friends Rescued (FR) o kanhing mga rebelde nga mibalik sa sabakan sa balaod ug mipili sa malinawon nga paagi sa pagpuyo.

Gidumala sa Provincial Treasurer’s Office (PTO), ubos sa pagpanguna ni Provincial Treasurer Evelyn Espra, ang pag-apod-apod sa pinansyal nga tabang nga gihimo sa VIP Clubhouse, Davao del Norte Sports and Tourism Complex (DNSTC), Mankilam, Tagum City, niadtong Agosto 13.

Mitambong usab sa maong kalihokan ang mga representante sa Philippine Army, Philippine National Police (PNP), Department of the Interior and Local Government (DILG), ug OPAPRU, nga nagpamatuod sa hiniusang paningkamot sa mga ahensya sa paghatag og suporta sa mga pamilyang naapektuhan sa armadong panagbangi.

Sumala sa mga nagpatuman sa programa, dili grado ang nanag-unang basehan sa pagdawat sa educational assistance, basta pasado ang mga estudyante sa tanan nilang subjects ug kwalipikado isip mga anak sa mga kanhing rebelde nga mibalik na sa gobyerno ug mipili sa kalinaw.

Gilauman nga pinaagi niini nga tabang, mas mapadayon sa mga benepisyaryo ang ilang pag-eskwela ug mas mapalig-on ang oportunidad alang sa mas maayong kaugmaon.

Writer/Photo: Lorna Tripoli