Pormal nang gisugdan sa Davao del Norte Hospital–Carmen Zone niadtong Agosto 7 ang selebrasyon sa 2026 National Hospital Week nga adunay temang, "Juan Health for JuanNation: Makabagong Teknolohiya sa Ospital na Mapagkalinga."
Gipangulohan ni Acting Chief of Hospital II, Dr. Ruchille Arrocena, ang pag-abli sa maong kalihokan nga mahuman hangtod petsa 12 aron pagpasidungog sa tanang health care workers ug kawani sa ospital, gikan sa mga utility personnel hangtod sa mga managing officers, isip pag-ila sa ilang dedikasyon ug mapinanggaong serbisyo sa katawhan.
Kabahin sa unang adlaw sa selebrasyon ang Banner Raising Ceremony, Zumba Contest, Team Yells Competition, ug ang pagpili sa Mr. and Ms. Health Care Ambassador 2026, diin gipakita sa mga kandidato ang ilang abilidad, kaalam, ug kahanas sa question and answer portion.
Gibuksan usab ang Carmenzonelympics 2026 pinaagi sa Torch Lighting Ceremony ug Oath of Sportsmanship, nga gisundan sa aktibong panag-indigay sa matag unit sama sa Medical Vanguards, Nursing Code Blue, ug Hospital Operations and Patient Support Service (HOPSS).
Bisan sa init nga panahon, gipakita sa mga empleyado ang ilang kusog, panaghiusa, ug espiritu sa pagtinabangay pinaagi sa aktibong pagsalmot sa kompetisyon. Nidaog nga kampeyon sa Zumba ug Flag raising ang Nursing Code Blue, samtang nahimong kampeyon sab sa yells ang Medical Vanguard.
Mitambong sab si Provincial Economic Enterprise Development Officer Dr. Dominic Basalo, nga mihatag og espesyal nga mensahe aron dasigon ang tanang health care workers sa pagpadayon sa matinud-anon ug dekalidad nga serbisyo alang sa katawhan.
Writer: Lorna TripoliPhotos: Bembem Ulay
