Nakadawat og Gantimpala Agad Awards ang 115 ka mga empleyado sa Kapitolyo, isip pag-ila sa ilang talagsaong serbisyo ug dedikasyon sa pagpanarbaho.
Sa mensahe ni Governor Edwin "Kuya Gob" Jubahib, iyang gipasiugda nga ang maong pasidungog simbolo sa kalidad nga serbisyo publiko ug usa ka paagi sa pagpasalamat sa mga empleyado nga adunay dakong kontribusyon sa kalamboan sa probinsya.
"Sulod sa pito ka katuigan, nagkahiusa gayud kita sa atong tumong nga mahatagan og kalidad nga serbisyo ang mga Dabaonon. Dili ta mosugot nga dili mahatagan og pag-ila ang inyong pagpaningkamot aron mas mahimong dedikado pa mo sa inyong mga buluhaton," ingon ni Kuya Gob.
Dugang pa niya nga ang labing importante mao ang mabati sa mga Dabaonon nga adunay gobyerno nga tinuoray nga nag-atiman ug nag-alagad kanila pinaagi sa paghatag og episyenteng serbisyo sa mga empleyado sa probinsyal nga panggamhanan sa Davao del Norte.
Ang Gantimpala Agad Awards usa ka programa nga gipangunahan sa Provincial Human Resource Office (PHRMO). Kabahin kini sa implementasyon sa Civil Service Commission (CSC), nga nagmando sa paghatag og mga insentibo ug pasidungog sa mga empleyado nga nagpakita og talagsaong serbisyo sa ilang trabaho.
Pinaagi sa maong programa, gilauman nga mas mapalig-on pa ang relasyon tali sa mga dabaonon ug mga kawani sa gobyerno. Tikang usab kini aron mas mapalambo pa ang probninsya.
