Opisyal nang gilusad sa Davao del Norte ang ‘Bigay Bigas Para sa Masa’, usa ka programa sa nasudnong panggamhanan nga nagtumong sa pagpalig-on sa food security ug pagtabang sa mga pamilyang nanginahanglan, karong adlawa, Hulyo 6, 2026.

Pinaagi sa Local Government Support Fund (LGSF), nakadawat ang probinsiya og P77 milyones nga pondo, diin gigahin kini sa pagpanghatag og 10 kilo nga bugas sa 101,315 ka mga kwalipikadong benepisyaro sa tibuok Davao del Norte. Dungan usab niini ang pag turnover sa P200,000 nga hinabang sa matag barangay ubos sa Socio-Civic Projects Fund (SCPF).

Gitambongan ang maong programa ni Special Assistant to the President Antonio “Ernesto” Lagdameo Jr., inubanan ni Governor Edwin “Kuya Gob” Jubahib, Vice Governor Clarice Jubahib, 1st District Representative De Carlo “Oyo” Uy, ug 2nd District Representative JM Lagdameo.

Sa iyang mensahe, gipadayag ni Governor Jubahib nga ang programa aduna pa’y ikaduha ug ikatulo nga hugna aron mas daghan pang kabus nga mga pamilya ang mahatagan sa maong ayuda. Matud pa niya, tumong sa programa mao ang pagpahupay sa kabug-at nga gibati sa katawhan tungod sa padayon nga pagsaka sa presyo sa mga batakang palaliton.

Samtang, gipaabot usab ni SAP Lagdameo ang direktiba ni Presidente Ferdinand Marcos, Jr. nga ipadool sa katawhan ang mga programa ug serbisyo sa gobyerno aron mas daghan pa ang makabenepisyo niini. Gipasabot usab niya nga nadugangan pa og P40 milyones ang LGSF sa probinsiya aron mas managhan pa ang makabenepisyo sa mga programa sa gobyerno.

Nanghinaot ang mga opisyales nga makatabang ang maong ayuda sa pagtubag sa mga panginahanglan sa mga kabus nga komunidad, bisan sa gamay nga pamaagi.