Gidala sa probinsyal nga panggamhanan sa Davao del Norte ang Kadasig Project ngadto sa Balai Karoyawan No Bakalag sa Sitio Talos, Barangay San Jose, Santo Tomas aron mahatagan og libreng serbisyong beterinaryo ug suporta sa pang-agrikultura ang mga lumulupyo niini nga lugar.
Gipangunahan ang maong serbisyo ni Governor Edwin "Kuya Gob" Jubahib, pinaagi sa suporta sa Provincial Administrator's Office – Special Projects and Programs Division (PADO-SPPD) ug sa Provincial Veterinary Office (PVO).
Lakip sa mga serbisyong gihatag ang libreng tambal ug bitamina alang sa mga kahayopan, anti-rabies vaccination sa mga iro, deworming o purga, ug paghatag og impormasyon bahin sa hustong pag-atiman ug pagpainom og tambal sa mga hayop.
Matud ni Project Development Officer II Russel Malalis, ang tumong sa programa mao ang pagpalig-on sa kahimsog sa mga kahayopan sa komunidad.
"Lami kaayo ni nga panan-awon nga nakaserbisyo ta sa mga binuhing hayop karon diri sa mga taga Sitio Talos ug makita nato nga ubay-ubay gyud pud ang miadto aron mo-avail sa maong services," ingun ni Malalis.
Gihatagan usab ang mga residente og binhi sa okra ug garden shovel isip kabahin sa backyard gardening program aron makasuporta sa ilang pang adlaw-adlaw nga kinabuhi.
Dako usab ang pagpasalamat sa mga lider sa Sitio sa pag-abot sa maong programa.
Sulti ni Barangay San Jose IP Mandatory Representative Datu Edwin Tumaytay, dako kaayong tabang ang mga serbisyong ilang nadawat ilabina sa mga mag-uuma ug mga nagbuhi og kahayopan.
"Bag-o lang gyud nahurot og kamatay ang among mga manok, unya ang among mga kanding magsige og libang ug mamayat, ang baboy pud kalit ra mamatay. Mao nang dakong pasalamat gyud mi nga naabot ang serbisyo sa among mahal nga Gobernador," sulti ni Tumaytay.
Usa sa mga nakabenepisyo sa programa mao si Bebing Tumaytay Daoban, kinsa nagpasalamat tungod kay mahatagan na gyud og alibyo ang gipamati sa iyang binuhi nga iro.
"Dako kaayong pasalamat namo diri sa Sitio Talos nga naabot gyud ang programa ni Kuya Gob Jubahib. Naluoy gyud ko sa akong iro kay luya na kaayo, apan karon nalipay ko nga adunay ahensya sa gobyerno nga mitabang aron mabitaminahan ang among mga iro, kabaw, baboy, manok ug kanding," ingun ni Daoban.
Samtang, gipasiugda ni IP Youth Federation President Datu Makatukaw Gilbert Aling nga ang pag-abot sa Kadasig Project usa ka pamatuod nga ang mga programa sa probinsyal nga panggamhanan nakaabot bisan sa mga hilit nga komunidad.
"Daghan kaayong salamat sa liderato sa atong Gobernador Kuya Edwin Jubahib. Sa akong nakita, dili lang sa mga dagkong lugar nakaabot ang iyang mga programa, kundili bisan diri sa Sitio Talos. Dako kaayo among kalipay isip tribu kay among nabati ang tabang sa gobyerno ug ang gugma nga gipakita sa among komunidad," matud ni Aling.
