Nagpalig-on ang Probinsyal nga Panggamhanan sa Davao del Norte sa kahibalo sa mga kawani pinaagi sa implementasyon sa Basic Strategic Competency-Based Human Resource Development o HRD Plan Year 2, Calendar Year 2026 pinaagi sa usa ka learning session nga nagtutok sa Human Resource Management, ilabina sa Leave Administration ug Compensation.

Gipahigayon ang maong kalihokan niadtong Hulyo 28 sa DNSTC Pavilion, Government Center, Mankilam, Tagum City, diin mitambong ang 57 ka mga empleyado gikan sa Provincial Human Resource Management Office, Information Technology Office, ug uban pang mga departamento.

Gipangunahan ni Ms. Lourdes Amerkan, Chief Human Resource Specialist sa Civil Service Commission Regional Office XI, uban sa iyang mga kaubanan, ang kalihukan nga nagtumong sa pagpasabot sa mga polisiya.

Gipasabot sa Civil Service Commission ang nagkalain-laing leave benefits nga mahimong ma-avail sa mga kawani, lakip ang Special Emergency Leave nga lima ka adlaw alang sa mga naapektuhan sa natural nga kalamidad, ingon man ang sick leave, vacation leave, maternity leave, ug uban pang mga benepisyo nga gitugot ubos sa balaod.

Gihisgutan usab nga ang mga opisyals, mga pangulo sa departamento, ug mga empleyado sa gobyerno sama sa permanent ug casual nga motuman sa gitakdang oras sa serbisyo, adunay katungod sa 15 ka adlaw nga vacation leave ug 15 ka adlaw nga sick leave matag tuig nga adunay saktong sweldo, gawas sa mga Sabado, Domingo, ug mga opisyal nga holiday.

Ang maong pagbansay kabahin sa padayon nga pagpalambo sa kapasidad sa mga kawani aron mas episyente, propesyonal, ug epektibo ang ilang pag-alagad sa katawhan.