Dako ang pasalamat ni Governor Edwin “Kuya Gob” Jubahib sa suporta sa nasyonal nga panggamhanan human nadawat sa DavNor PLGU ang ₱44.6 milyones nga pinansyal nga hinabang ubos sa Socio-Civic Projects Fund (SCPF).

Personal kini nga gitunol ni President Ferdinand “Bongbong” Marcos, Jr. atol sa “Bawat Bayan Makikinabang” program nga gipahigayon sa Provincial Capitol Compound sa Nabunturan, Davao de Oro. Lakip usab sa nakadawat niini ang probinsiya sa Davao de Oro ug Davao Occidental.

Subay sa SCPF, ang tanang 223 ka barangay sa probinsiya makadawat og ₱200,000 nga pondo, diin magahin kani isip tabang sa mga presidential scholars ug sa pagpalambo sa mga development projects aron matubag ang nagkalainlaing panginahanglan sa matag komunidad. Gilaoman nga makatabang kini sa kapin 1,500 ka mga barangay scholars sa tibuok probinsiya.

Atol sa seremonya, gipasiugda ni PBBM ang importansya sa lig-on nga pagtinabangay tali nasyonal ug lokal nga panggamhanan aron mas epektibong matubag sa gobyerno ang panginahanglan sa katawhan. Giduso usab niya ang responsable nga paggamit sa pondo aron masiguro nga mapahimuslan kini sa husto nga mga programa ug proyekto.

Samtang gipadayag usab ni Kuya Gob ang iyang kinasingkasing nga pagpasalamat sa nasyonal nga panggamhanan sa padayon nga pagsalig ug suporta sa probinsiya. Matud niya, dako kini nga tabang sa pagpalig-on sa mga komunidad ug makapuseag sa edukasyon ug kalamboan sa katilingban.