Kadasig ug pagka-mamugnaon ang dala sa mga batan-ong lider ug mga miyembro sa Pag-asa Youth Association of the Philippines - Ang Kabataang Organisado kon PYAP-AKO Summit nga gipahigayon sulod sa tulo ka adlaw sa DavNor Gym, DNSTC.

Mipartisipar ang mga kabatan-onan sa nagkalainlaing aktibidad nga nagtumong sa pagpakita sa ilang katakos sama sa sociocultural competition, youth caravan, larong nayon, ug seminar.

Gihatagan og kabug-aton ni Governor Edwin “Kuya Gob” Jubahib sa iyang mensahe ang importante nga papel sa mga kabatan-onan isip pinakadakong kusog sa pagbag-o sa komunidad ug sa nasud. Gidasig usab niya ang mga partisipante sa pagpadayon sa ilang kaandam sa pag-alagad sa probinsiya.

Ubos sa tema nga “Sustaining the Flame: Institutionalizing Empowered Leadership, Strengthening Governance, and Advancing Development Pathways for a Future-Ready PYAP-AKO”, ang maong aktibidad nakasentro sa paghatag og gahom sa mga out-of-school youth pinaagi sa pagdugang sa ilang kaalam sa mga importante nga butang, sama sa digital literacy, health education, ug community building.

Tumong usab sa aktibidad nga mapasiugda ang papel sa mga kabat-onan sa pag-apil sa mga importante nga proseso sa paghimo ug mga desisyon, sama sa pagmugna og mga resolusyon ug pakig-alayon sa mga youth development council sa matag LGU.

Ang maong aktibidad gihatagan og dakong pagtagad sa Probinsiyal nga panggamhanan sa Davao del Norte pinaagi sa Provincial Social Welfare and Development Office, ug sa pakig-alayon sa mga PYAP organizations sa probinsiya.