Sikop ang 2,038 ka kinarton sa mga ilegal nga sigarilyo nga nagkantidad og ₱150,950,000, sa gikasa nga buy-bust operation sa Criminal Investigation and Detection Group - Davao del Norte Provincial Field Unit (CIDG-DNPFU) sa Brgy. Busaon, Tagum City niadtong Hulyo 23.

Ang mga nakumpiska nga karton adunay sulod nga 50 ka reams sa sigarilyo. Gawas niini, narekober usab sa operasyon ang marked money, tulo ka mga sakyanan, ug usa ka caliber .45 nga pistola uban ang steel magazine.

Sikop sa maong operasyon ang lima ka mga suspek nga nadakpan mismo sa aktong pagpamaligya sa mga sigarilyo ug sa ilang pagdawat sa buy-bust money gikan sa mga operatiba. Gidala na sila sa Tagum City Police Station diin temporaryong silang gidetenar samtang gapadayon ang imbestigasyon.

Base sa inisyal nga assessment, ang deficiency tax sa mga nasakmit nga sigarilyo mikabat sa P282,603,719.

Kini kabahin sa gipakusgan nga Oplan Mega Shopper (Buy-bust) Project sa CIDG batok sa pagpayuhot ug pagpamaligya sa mga kontrabando nga produkto, ug sa paglapas sa Sections 7 ug 9 sa Republic Act No. 12022, o ang Anti-Agricultural Economic Sabotage Act.

Isip daliang aksyon sa maong operasyon, nagpahulam si Governor Edwin “Kuya Gob” Jubahib og tulo ka dump trucks gikan sa Provincial Engineer’s Office aron mahatod ang mga nasakmit nga kontrabando sa pasilidad sa CIDG.

Pinaagi sa Provincial Peace and Order Council, gimandoan usab sa gobernador ang pagpakusog sa mga operasyon batok sa smuggling ug illegal nga pagbaligya sa mga produkto sa probinsiya.

Nagpadayon ang imbestigasyon sa mga awtoridad aron mahibal-an ang tibuok pwersa sa pagpayuhot ug pag-apod-apod sa mga smuggled cigarettes, lakip na ang uban pang mga indibidwal nga nalambigit sa maong ilegal nga kalakaran.