Gipasidunggan sa Probinsyal nga Panggamhanan sa Davao del Norte ang 13 ka retiradong empleyado ug duha ka posthumous awardees atol sa Salamat Mabuhay Program nga gipahigayon sa Molave Hotel sa Osmeña Street, Tagum City niadtong Hulyo 16.
Gipangulohan sa Provincial Human Resource Management Office (PHRMO) ang maong kalihokan aron ipadayag ang pag-ila ug pagpasalamat sa mga empleyado nga naghatag og dugay, matinud-anon, ug halangdong serbisyo sa probinsya. Ang mga gipasidunggan adunay rekord sa serbisyo nga naglangkob gikan sa 17 hangtod 38 ka tuig.
Lakip sa mga gipasidunggan sa PLGU DavNor ubos sa liderato ni Governor Edwin I. Jubahib sila si Emelia Palero, PG Department Head sa Provincial Budget Office (PBO), nga adunay 38 ka tuig nga serbisyo, Dennis Devilleres, PG Department Head sa Provincial Economic, Environment and Enterprise Development Office (PEEDO), nga adunay 26 ka tuig nga serbisyo, ug Rosalia Nahine, Farm Foreman sa Provincial Agriculture Office (PAGRO), nga adunay 17 ka tuig nga serbisyo, uban sa mga empleyadong malampusong mitapos sa ilang karera sa serbisyo publiko.
Gihatagan usab og posthumous recognition sila Allen Llaban sa Provincial Human Resource Management Office (PHRMO), nga nagserbisyo sulod sa 15 ka tuig ug girepresentahan sa iyang inahan, ug Agustin Tan Jr. sa Provincial Administrator's Office (PADO), nga adunay 25 ka tuig nga serbisyo ug girepresentahan sa iyang asawa.
Isip timaan sa pagpasalamat sa ilang mahinungdanong kontribusyon, gihatagan ni Governor Jubahib ang matag retirado og service ring nga adunay katugbang nga karat. Gihatagan usab sila og espesyal nga mga regalo, samtang ang ilang mga pamilya, higala, ug kauban sa trabaho naghatag og mga bulak isip pagpasidungog sa ilang halangdong pag-alagad.
Sa gipadungog nga virtual message sa mga kaubanang trabahante sila nag-ingon nga ang mga retirees “Less Tension, Welcome Pension", nga nagsimbolo sa pagsugod sa bag-ong yugto sa kinabuhi sa mga retirado human sa ilang malampusong pag-alagad sa katawhan. Pinaagi sa maong programa gipadayon ang pag-ila ug paghatag og bili sa dedikasyon sa mga empleyadong nahimong kabahin sa dekalidad nga serbisyo sa kapitolyo.
