"Very impressive!"
Mao kini ang paghulagway ni Governor Ricarte R. Padilla sa Camarines Norte human niyang masaksihan ang implementasyon sa KAAGAPAY Program atol sa benchmarking visit sa Davao del Norte niadtong Hulyo 16. Alang sa gobernador, ang flagship agriculture ug livelihood program ni Governor Edwin I. Jubahib usa ka modelo nga mahimong sundon sa ilang probinsya aron mapalig-on usab ang panginabuhian sa ilang mga komunidad.
Matud ni Padilla, ang KAAGAPAY dili lamang usa ka programa sa agrikultura, kondili usa ka inisyatiba nga direktang nabati sa katawhan pinaagi sa mga oportunidad sa panginabuhian. Mao usab kini ang hinungdan nga siya mismo ang nanguna sa delegasyon sa Camarines Norte aron personal nga tun-an ang implementasyon niini.
“Nakita ko po yong kanyang (Kuya Gob) programa na talagang nakabaon sa mga kababayan niya na totoo talagang nararamdaman yong programa lalong-lalo na sa livelihood. At yon po ang dahilan bakit ako nag-initiate na pumunta rito sa Davao dahil yon po ang kailangan namin sa Camarines Norte,” ingon sa gobernador.
Atol sa benchmarking, gisuroy ang delegasyon sa nagkadaiyang pasilidad nga kabahin sa KAAGAPAY Program, lakip ang DavNor KAAGAPAY Hub ug Pasalubong Shop, Banana Tissue Culture Laboratory, MF-BAEX poultry incubator ug brooding facility, Breeding Farm Resource Center sa Talaingod, Asian Hybrid Corn Processing Center, DavNor Freshwater Hatchery sa Kapalong, ug ang Quero Lakatan Farm sa New Corella. Ang pagbisita nagtugot sa delegasyon nga makita sa aktuwal ang sistema sa produksyon, pagproseso, marketing ug livelihood development nga gipatuman sa probinsya.
Ang grabeng nakapainteres sa gobernador mao ang Banana Tissue Culture Laboratory, ang corn processing facility, ug ang Freshwater Hatchery, diin iyang gikakurat ang kadak-on sa mga red tilapia ug hito nga gibuhi sa pasilidad.
“Nagulat ako ganyan kalalaki yong halos gahita yong inyo pong mga hito. Sabi ko, ngayon lang ako nakakakita ng ganyan kaya sabi ko talagang grabe grabe. I am really impressed,” sulti niya.
Matud pa ni Padilla, ang maong pagbisita nagpamatuod nga ang Davao del Norte adunay organisado ug sustenableng pamaagi sa agricultural development nga mahimong iangay sa sitwasyon sa Camarines Norte.
Samtang, sumala ni Alphabet Gulanes, Lead Coordinator sa DavNor KAAGAPAY Technical Working Group, personal nga direktiba ni Governor Jubahib nga ipakita sa mga bisita ang aktuwal nga resulta sa programa aron makita nila ang tibuok value chain sa KAAGAPAY.
“Daghan-daghan ta’g gipasuroyan kay si Kuya Gob gusto gyud niya ipakita ang mga nahimo ug accomplishments sa KAAGAPAY… All of those, poultry, corn, and lakatan, and of course the hatchery sa fingerlings, those are very interesting aspect sa kanila ni Governor Padilla,” matud ni Gulanes.
Gibutyag usab ni Gulanes nga dili lamang ang Camarines Norte ang nagtuon sa programa. Matud niya, nagpadayon usab ang interes sa ubang mga lokal nga panggamhanan nga masayran ang pamaagi sa implementasyon sa KAAGAPAY sa Davao del Norte.
“Daghan-daghan nang nag-benchmark sa KAAGAPAY even ang Davao de Oro, Butuan, and of course ang Sawata, nagaadto na didto sa atoa because they are really very much interested in how Kuya Gob has implemented his vision. Yong vision niya na-implement natin nang maayos,” dugang niya.
Sa pagtapos sa benchmarking, gipasalamatan ni Padilla ang Provincial Government of Davao del Norte sa pag-abli sa ilang mga programa ug kasinatian. Nagpasalig usab siya nga ang mga leksyon nga ilang natun-an dili kutob sa pagtan-aw lamang, kondili ilang paningkamotan nga mapatuman usab sa ilang probinsya.
“Uulitin ko sa susunod siguro pagbalik ko rito meron din ako sigurong magandang balita kung ano man yong mga nakita namin dito ay ginagawa na rin namin doon po sa probinsya ng Camarines Norte,” sulti sa gobernador.
Writer: Jun Rey VillanuevaPhotos: Andrew John Hababag
