Gipangunahan sa Provincial Public Employment Service Office (PESO) sa Probinsyal nga Panggamhanan sa Davao del Norte ang pagpanghatag og oportunidad sa trabaho alang sa mga Dabaonon pinaagi sa duha ka adlaw nga Local Recruitment Activity (LRA) nga gipahigayon sa DavNor TechVoc Center.
Gisugdan ang maong kalihokan pinaagi sa SM Store Hiring Activity karong adlawa, Hunyo 16, 2026, diin nakadawat kini og dakong interes gikan sa mga jobseekers nga adunay mokabat sa 400 ka online pre-registrants. Ipadayon usab ang hiring activity ugma, Hunyo 17, 2026, pinaagi sa partisipasyon sa Virginia Food, Inc. aron maghatag og dugang nga oportunidad ug kapilian sa mga aplikante sa pagpangita og trabaho.
Kabahin usab sa employment assistance ang gipahigayon nga Pre-Employment Seminar for Local Applicants (PESLA) niadtong Hunyo 14, 2026, diin mitambong ang 130 ka aplikante. Samtang, nagpahigayon usab og laing PESLA session sa susamang adlaw alang sa mga aplikanteng wala nakaapil sa unang orientation aron mas daghan pa ang maabot nga jobseekers. . Pinaagi niini, gihatagan og giya ang mga partisipante sa hustong paghimo og resume, application tips, job matching, Labor Standards, ug Worker’s Right.
Aron matabangan ang mga jobseekers sa pag-andam sa ilang mga dokumento, nag-andam usab ang PESO og computer units nga ilang magamit alang sa document correction ug pagkompleto sa ilang employment requirements.
Gihatagan usab og libre nga lugaw ang mga aplikante isip dugang nga suporta ug pag-atiman sa mga partisipante, pinaagi sa inisyatibo nila Governor Edwin I. Jubahib ug Vice Governor Clarice Jubahib.
Para sa dugang detalye, mamahimong bisitaha ang facebook page sa DavNor PESO para sa mga bakanteng trabaho.
