Dungan nga gitanom sa kapin 200 ka mga tig-boluntaryo ang 59,000 ka mga Mangrove Trees sa Sitio Cabugan, Barangay Busaon, Tagum City, isip sumpay sa selebrasyon sa ika-59 nga anibersaryo sa probinsiya sa Davao del Norte.
Ang maong programa gipangulohan ni Davao del Norte 1st District Board Member Ronald “Nono” Eliot, kinsa kasamtangang milingkod isip Chairperson sa Committee on Environment and Natural Resources sa probinsiya. Kini ubos usab sa suporta ni Governor Edwin “Kuya Gob” Jubahib, Vice Governor Clarice Jubahib, Tagum City Councilor Catherine Eliot, ug uban pang mga sakop sa konseho sa siyudad ug sa probinsiya.
Sulti ni Board Member Eliot, napili ang Busaon isip unang lokasyon sa maong proyekto tungod sa dakong sa ilang nakita nga dakong tabang niini sa maong lugar. Nagaplano usab sila na magpahigayon og susamang programa sa uban pang mga munisipyo sa probinsiya.
“Nasayod ta nga grabe ang kausaban sa panahon. Dinhing dapita, gabanlas na gyud ang yuta. Gitanom nato ang mangrove dinhi kay sayod ta nga makatabang gyud ni sa pagkunhod sa coastal erosion, at the same time musala sa carbon, ug makatabang pud sa climate change… Initial ni siya dinhi sa Busaon kay nakita pud namo ang pagbanlas sa baybayon. Una lang ni dinhi sa Busaon. Sunod ta sa Carmen, ug sa Panabo. Katong mga naay coastal area sa Davao del Norte,” pahayag ni Eliot.
Gipunting usab ni Eliot nga ang pagtanom og Mangrove Trees usa sa mga pinaka-epektibo ug natural nga flood control, ug daghan usab kini benepisyo sa kinaiyahan. Nag-andam usab ang iyang opisina sa pagpahigayon og daghan pang mga tree planting nga mga aktibidad, inubanan sa padayon nga pag-atiman niini.
Gipasalig ni Eliot nga adunay mga barangay association ang natahasan nga mu-monitor sa progreso sa mga gipangtanom alang sa sunod nga duha ka tuig. Sulti niya, miandam ang probinsiya og MOA aron makadawat og honorarium ang mga tig-mintinar sa mga pananom.
“Naa ta’y organization nga taga-dinhi, since naka-MOA ta nila. Para makatabang pud ta nila, naa tay honorarium ug tabang sama sa bugas para at least, matabangan pud nato sila. At the same time, maka-atiman pud sila diri,” dungag ni Eliot.
Gipaabot usab sa mga opisyales sa barangay ang ilang pagpasalamat tungod sa pagkapili sa ilang lugar isip lokasyon sa maong proyekto. Ania usab sa maong aktibidad ang mga personahe gikan sa Provincial Environment and Natural Resources aron mogiya sa mga mibolunyaryo sa saktong pagtanom sa mga bakhawan.
