Gipasidunggan ni Governor Edwin I.Jubahib ang 93 ka mga empleyado atol sa Gantimpala Agad Awarding nga gipahigayon karong adlawa sa VIP Clubhouse,DNSTC,Mankilam, Tagum City.
Giorganisar sa Provincial Human Resource Management Office ( PHRMO) ang maong kalihokan isip pag-ila ni Gobernador Jubahib sa mga empleyadong nagpakita og dedikasyon ug maayong pagserbisyo isip iyang mga kaabag sa pagdumala sa probinsya.
Gihatagan sa probinsyal nga panggamhanan og sertipiko ug token ang mga awardee nga gikan sa nagkalain-laing departamento, lakip ang Provincial Administrator's Office–Information Communication Technology, Provincial Economic Enterprise Development Office ug uban pang mga opisina sa kapitolyo.
Pinaagi sa iyang representante, gipasalamatan sa gobernador ang mga empleyado alang sa ilang matinud-anong serbisyo. Giawhag usab niya sila nga ipadayon ang ilang kakugi aron magpabiling ehemplo ug inspirasyon sa ilang mga kauban sa paghatag og dekalidad nga serbisyo publiko.
Sa iyang mensahe, giingon ni PHRMO Head Edwin Palero nga ang mga empleyado mao ang kamot ug mga tiil sa gobernador sa paghatag og episyenteng serbisyo sa katawhan. Iyang gipasabot nga ang kalampusan sa administrasyon resulta usab sa maayong pagpanarbaho ug paningkamot sa matag kawani.
Gipahibalo usab ni Palero nga padayon karon nga gitukod ang Day Care Center alang sa mga anak sa empleyado nga nag-edad og 0 hangtod 4 ka tuig, ingon man ang katukoran sa housing project para sa mga trabahanti.
Nagpadayon ang PLGU Davnor sa pagpalig-on sa kalidad sa serbisyo sa katawhang Dabawnon pinaagi sab sa pag-ila, pagdasig, ug pag-atiman sa kaayohan sa mga empleyado alang sa mas gipakusgan nga serbisyo sibil.
