Pormal nga gilusad sa Probinsyal nga Panggamhanan sa Davao del Norte ang DavNor Youth Responders Program ubos sa inisyatiba sa opisina ni Vice Governor Clarice Jubahib, dungan sa pagsaulog sa National Disaster Resilience Month 2026.

Ubos sa temang “Naghahanda at Kumikilos tungo sa panatag sa Bagong Pilipinas," gipahigayon ang usa ka Provincial Kick-Off dungan sa usa ka Ceremonial Signing sa Memorandum of Understanding (MOU) tali sa Probinsiyal nga Panggamhanan sa Davao del Norte ug Sangguniang Kabataan Federation kauban ang mga SK officials sa nagkadaiyang local government units.

Matod ni VG Clarice kinsa girepresenta ni Chief of Staff Nickel Suaybaguio, unang tumong sa Youth Responders Program mao ang paghulma ug pagbansay sa kapaspas ug kaalam sa 40 ka mga kabatan-on-an gikan sa matag LGU sa tibuok probinsya, kinsa nag-edad og 18 hangtod 35 anyos.

Pinaagi sa maong inisyatiba, makakat-on ang sektor sa kabatan-onan sa mga life-saving skills sama sa Basic Life Support (BLS) ug Cardiopulmonary Resuscitation (CPR).

Sumala usab ni Provincial Disaster Risk Reduction and Management Office (PDRRMO) Head Glenda Delideli, ang eksperto gikan mismo sa ilang buhatan ang modumala ug motudlo sa mga batan-ong responders. Gipaniguro usab ni Delideli nga ang tanang partisipante nga makahuman sa hugot nga pagbansay makadawat og Certificate of Completion isip pagpamatuod sa ilang katakus.

Ipahigayon ang unang hugna sa training karong Hulyo 11 hangtod 12 sa Munisipyo sa Carmen ug magsilbing pormal nga sugod sa paghulma sa bag-ong henerasyon sa mga DavNor Youth Responders nga andam moresponde panahon sa mga katalagman ug kalamidad.