Nagmiting ang Provincial Community-Based Monitoring System Coordinating Board sa VIP Clubhouse, DNSTC, Mankilam, Tagum City,niadtong Hunyo 29, aron hisgutan ang mga preparasyon alang sa implementasyon sa Community-Based Monitoring System (CBMS) sa probinsya.

Gidumala ni Chief Statistical Specialist Jessie Madulin sa Philippine Statistics Authority (PSA) ang maong miting nga gitambongan sa representante ni Gobernador Edwin I. Jubahib nga si Provincial Administrator Atty. Ralph Dela Cruz, ug ang uban nga nitambong gikan sa nagkalain-laing National Government Agencies (NGAs), Non-Government Organizations (NGOs), Armed Forces of the Philippines (AFP), Philippine National Police (PNP), mga department heads sa kapitolyo, ug mga stakeholders.

Atol sa maong panagtigom, gipresentar sa PSA ang kinatibuk-ang pagplano sa Community-Based Monitoring System nga gikatakdang ipatuman sugod sa Mayo 2027. Gipasabot usab nga ginahimo ang CBMS matag tulo ka tuig isip usa ka importante nga himan sa pagkuha sa tukma ug kasaligang datos nga magsilbing basihan sa pagplano sa mga programa, proyekto, ug mga polisiya sa lokal ug nasyonal nga pangagamhanan.

Gihisgutan usab sa board ang mga posibleng galastuhan nga may kalabotan sa pagbansay ug pagsuweldo sa mga enumerator nga mopahigayon sa data collection. Dugang pa, gituki ang posibleng partisipasyon sa mga lokal nga kagamhanan sa pagtabang sa processing operations sa higayon nga dili igo ang pondo nga mahatag sa PSA National alang sa implementasyon sa maong kalihokan.

Isip resulta sa panagtigom, gisugyot sa Provincial CBMS Coordinating Board ang usa ka resolusyon nga nag-awhag sa onse ka mga LGUs sa paghatag og suporta sa operasyon sa CBMS aron masiguro ang malampusong pagpatuman sa pagkuha sa datos sa tibuok probinsya.

Gipasabot sa board nga dako ang papel sa CBMS sa paghatag og tukma ug kasaligang impormasyon nga mahimong basihan sa maayong pagdesisyon ug epektibong pagpatuman sa mga programa ug serbisyo alang sa kaayohan sa katawhan.