Gipalig-on sa Probinsyal nga Panggamhanan sa Davao del Norte ang kapasidad sa teknolohiya sa komunikasyon aron malikayan ang paglangay sa mga transaksyon sa gobyerno pinaagi sa paggamit sa sakto, paspas, ug kasaligan nga network system.
Aron makab-ot kini, nagpahigayon ang Provincial Administrator’s Office–Information Technology Division og lima ka adlaw nga pagbansay sa hisgotanan nga "Design and Implement a Scalable Enterprise Network Using Cisco Routing and Switching Technologies” nga gihimo sa DavNor TechVoc Conference Hall, Provincial Capitol, Mankilam, Tagum City gikan sa Hunyo 22-26.
Mitambong sa maong pagbansay ang 15 ka IT personnel nga sakop sa Information and Communications Technology (ICT ) Infrastructure Development and Maintenance Team sa kapitolyo ubos sa pagpanguna ni ICT Infrastructure Section Head Bernier Mejorada.
Matud ni Engr. Warren Badong, consultant, chief executive officer ug trainer sa Newbitech IT Solutions, gitumong sa pagbansay ang pagpalig-on sa kahibalo ug teknikal nga kahanas sa mga partisipante aron mas mapalambo ang ilang kapasidad sa pagsulbad sa mga problema sa network ug sa pagdumala sa online transactions ug operasyon sa tanang departamento sa kapitolyo. Lakip niini ang mga proseso sa procurement, payroll processing, ug uban pang serbisyong panggobyerno.
Gisaysay usab ni Engr. Badong nga gituki sa mga leksyon ug praktikal nga sesyon ang mga konsepto ug aplikasyon sa Cisco Certified Network Associate Version 7 (CCNAv7) , usa ka networking course ug certification curriculum nga gihimo sa Cisco alang sa mga estudyante ug mga propesyonal sa information technology.
Gipasabot sa programa ang mga batakang konsepto sa computer networking, IP address, paggamit sa mga device nga nagpadagan sa internet ug local networks, pagpanalipod sa network batok sa mga hulga, ug paggamit sa modernong pamaagi sa pagdumala sa network pinaagi sa software.
Dugang pa niya, ang Version 7 mao ang pinakabag-ong bersyon sa CCNA curriculum nga naglangkob sa mas moderno ug abante nga networking technologies kumpara sa mga nangaging bersyon.
Gitin-aw usab ni Badong ang kamahinungdanon sa hustong pagdisenyo, pagpatuman, ug pagmintinar sa enterprise network aron masiguro ang luwas, paspas, ug kasaligan nga sistema sa komunikasyon ug datos sa gobyerno.
Samtang, naglaum si Mejorada nga ang maong pagbansay makatabang sa pagpadali sa paghatag og episyente ug dekalidad nga serbisyo publiko pinaagi sa paggamit sa modernong teknolohiya.
