Taliwala sa padayon nga pagbangon sa Davao Occidental human sa 7.8 magnitude nga linog, tubig ang nag-unang panginahanglan sa liboan ka mga pamilya nga nagpabilin sa mga evacuation centers ug tent cities sa probinsya. Agi’g tubag niini, nagpadala ang Probinsyal nga Panggamhanan sa Davao del Norte og 654 ka bottled distilled water kagahapon aron makatabang sa mga komunidad nga labing grabeng naapektuhan sa kalamidad.
Sumala ni Khurtreyl T. Cubio, Davao Occidental Provincial Disaster Risk Reduction and Management Office (PDRRMO) – Emergency Operation Section Head, ang pinakagrabeng kadaot natala sa habagatang bahin sa Jose Abad Santos (JAS) ug sa tibuok munisipyo sa Sarangani. Sa inisyal nga datos, adunay kapin 22,000 ka pamilya ang naapektuhan sa JAS ug 7,000 sa Munisipyo sa Sarangani, samtang nagpadayon pa ang Post-Disaster Needs Assessment and Analysis (PDNA) aron matino ang tinuod nga gidak-on sa kadaot.
Gipadayag usab niya nga 13 na ang kumpirmadong namatay, samtang adunay mga missing persons nga wala pa marekober tungod kay gisuspende una ang search, rescue, and retrieval (SRR) operations sa pipila ka lugar human gideklarang dili luwas sa Mines and Geosciences Bureau (MGB) ang mga landslide-hit areas.
Nagpadayon usab ang pagmonitor sa pito ka nahitabong artificial damming, diin usa na ang naablihan pinaagi sa hiniusang paningkamot sa DPWH ug nagkadaiyang rescue agencies aron malikayan ang posibleng pagbaha sa ubos nga mga komunidad.
Bisan pa sa kalisod sa kahimtang, nagpadayon ang Provincial Government sa Davao Occidental sa pagpatukod og tent cities, community kitchens, temporary toilets, ug water systems sa mga evacuation sites. Nag-deploy usab kini og mga personnel gikan sa Provincial Engineering Office, PSWDO, PENRO, PAGRO ug uban pang mga opisina aron mapaspasan ang paghatag og serbisyo sa mga apektadong pamilya. Samtang ang mga lugar nga dili pa maagian sa sakyanan, gihatudan og hinabang pinaagi sa tabang sa Philippine Air Force ug Office of Civil Defense XI gamit ang helicopter.
Matud ni Marivic F. Hubac, Executive Assistant V sa Office of the Vice Governor sa Davao Occidental, ang labing gikinahanglan karon sa mga evacuees mao ang mainom nga tubig, mga sudlanan sa tubig, shelter kits, banig, malong, ug moskitero, samtang padayon nga ginaayo sa mga engineers ang naguba nga mga water sources tungod sa landslide. Gihangyo usab niya ang publiko nga ipadayon ang panaghiusa ug likayan ang paghatag og kolor-politikal sa relief operations, tungod kay ang prayoridad karon mao ang pagtabang sa tanang biktima sa kalamidad.
Agi’g tubag sa maong panginahanglan, nipadala ang Provincial Government of Davao del Norte, ubos sa mando ni Governor Edwin I. Jubahib, og 654 ka bottled distilled water, lakip ang 550 ka lima ka litrong tubig ug lain-laing gidak-on sa bottled water, nga gipundok pinaagi sa donation drive nga gipasiugdahan sa Provincial Administrator's Office–Employment and Workforce Development Division (PADO-EWDD), sa pakigtambayayong sa Public Employment Service Office Managers Association of the Philippines (PESO MAP) Davao del Norte, mga PESO Managers, Job Placement Officers, SPES grantees, provincial scholars ug uban pang mga donors.
"Nanghinaut si Kuya Gov nga ang among gidala nga hinabang makatabang sa mga pamilyang naapektuhan sa linog," matud ni Gloria Excelsa S. Pamugas, Division Head sa PADO-EWDD. Nagpasalamat usab siya sa tanang mga indibidwal ug organisasyon nga misuporta sa donation drive aron matabangan ang mga kaigsoonan sa Davao Occidental.
Sa bahin sa Davao Occidental, gipaabot ni Hubac ang dakong pagpasalamat sa mga probinsya ug lokal nga panggamhanan nga mitubag sa ilang panawagan alang sa tabang.
"Sa ngalan sa opisina ni Vice Governor Lorna Bautista-Bantigan, dako kaayo among pagpasalamat ilabina sa Provincial Government sa Davao del Norte ug sa uban pang LGUs nga mitabang kanamo niining lisod nga panahon," matud niya.
Writer: Jun Rey VillanuevaPhotos: Bembem Ulay
