Giuyonan sa Davao del Norte Provincial Development Council (PDC) ang mga programa ug polisiya nga nagtumong sa pagpalig-on sa kaayohan sa mga kabataan ug Persons with Disabilities (PWDs) sa Davao del Norte atol sa ilang miting nga gipangunahan ni Governor Edwin "Kuya Gob" Jubahib sa Capitol Pavilion, DNSTC.

Lakip sa giaprubahan ang Provincial Development Plan and Investment Program for Children (PDP-IPC) 2025-2028, usa ka multi-sektoral nga plano nga naglatid sa mga programa alang sa edukasyon, panglawas, nutrisyon, proteksyon, ug partisipasyon sa mga kabataan. Tumong niini nga matubag ang mga isyu sama sa malnutrisyon, kakulang sa pagtuon, child labor, child abuse, early pregnancy, ug uban pang hulga sa kaayohan sa mga bata sa probinsya.

Gi-endorso usab sa konseho ang resolusyon gikan sa Provincial Council on Disability Affairs aron mas mapalig-on ang mga programa ug serbisyo alang sa Persons with Disabilities (PWDs). Pinaagi niini, gilauman nga mapalapdan pa ang ilang akses sa panglawas, rehabilitasyon, panginabuhian, ug uban pang social protection programs, samtang ginapalig-on usab ang ilang partisipasyon sa mga kalihokan sa pagpalambo sa komunidad.

Ang maong mga lakang kabahin sa padayong paningkamot sa Provincial Government sa pagpalambo sa inklusibo nga kalamboan ug pagpanalipod sa katungod ug kaayohan sa mga kabataan ug uban pang sektor sa katilingban.