Malampusong gilunsad ang Turf Blessing ug Kick-Off Ceremony sa Football Festival nga gipangunahan sa North Davao Regional Football Association (RFA) isip kabahin sa pagsaulog sa ika-59th Araw ng Davao del Norte.

Gipahigayon ang kalihokan sa Pablito Aala DavNor RFA Artificial Football Turf niadtong Hunyo 20, 2026.

Ang maong pasilidad maoy unang ASEAN Football Federation (AFF) Artificial Football Turf Project sa Pilipinas nga gihatag sa DavNor RFA pinaagi sa Philippine Football Federation (PFF).

Gisugdan ang programa pinaagi sa pagbendisyon sa football pitch nga gipangulohan ni Reverend Father Rosil Naparan, sunod ang opisyal nga pag-abli sa ground field nga gitambongan sa mga opisyales sa probinsya, PFF, ug mga football clubs gikan sa nagkalain-laing lungsod sa Davao del Norte.

Human sa ceremonial opening, gisugdan dayon ang kick-off sa 8x8 Football Festival diin aktibong miapil ang mga kabatan-onan ug football enthusiasts sa probinsya.

Gilaoman nga ang maong proyekto makapalig-on pa sa pagpalambo sa football skills sa mga kabataan ug makahatag og dugang oportunidad kanila nga ipakita ang ilang talento sa isport.