Malipayong gisaulog sa Davao del Norte Hospital (DDNH) - Kapalong Zone ang ilang ika-51 nga Founding Anniversary karong adlawa, Hunyo 18, ubos sa temang, “Singkwentay-uno ka tuig sa pag-serbisyo: Padayon nga kalambuan alang sa katawhan.”

Sumala ni Chief of Hospital Dr. Jessie Belga, gihatagan og dakong importansya sa maong selebrasyon ang kakugi ug sakripisyo sa mga trabahante sa ospital, partikular na ang mga medical personnel. Gi-highlight kini pinaagi sa usa ka "Employees' Day" nga nagtanyag og mga libreng pamper services sama sa facial treatment, eyelash extension, manicure, pedicure, ug relaxing massage.

Gawas niini, nagpahigayon sad og sunod-sunod nga libreng serbisyong medikal ang DDNH-Kapalong Zone alang sa komunidad. Lakip niini ang dental services, pre-natal checkup nga adunay libreng bitamina para sa mga mabdos, eye consultation nga may libreng reading glasses, blood sugar testing, ug pagpang-apod-apod og health kits ngadto sa mga pasyente.

Matod ni Dr. Belga, kini nga mga kalihokan maoy paagi sa ospital sa pagpadayag sa ilang dakong pasalamat sa mga empleyado ug sa komunidad nga ilang kauban sa milabay nga 51 ka tuig.

“For 51 years, our hospital has remained steadfast in its commitment to provide quality, accessible, and compassionate healthcare to the people it serves. This milestone is not only a celebration of our history but also a testament to the dedication, resilience, and teamwork of all those who contributed to our growth and success,” ingon ni Dr. Belga.

Nakigduyog sab sa maong selebrasyon sila si Kapalong Municipal Mayor Eduardo Timbol, Sto. Tomas Municipal Mayor Roland Dejesica, ug si Jandel Romano nga nagrepresenta kang Governor Edwin "Kuya Gob" Jubahib. Anaa usab si Provincial Legal Officer Atty. Charina Cabrera isip representante ni Vice Governor Clarice Jubahib, PEEDO Head Dr. Dominic Basalo ug ang tibuok puwersa sa mga medical personnel sa DDNH-Kapalong.