Gidagsa sa mga baryohanon ang Oplan Kaagapay sa Kalinaw ug Kalamboan (KKK) 2026 sa Panabo City sa pagpanguna ni Governor Edwin Jubahib ug Vice Governor Clarice Jubahib, nga gipahigayon sa Barangay New Visayas Multi-Purpose Gym, Panabo City, niadtong Hunyo 10.
Malipayon nga nidawat ang mga katawhan gikan sa nagkalain-laing libreng serbisyo sama sa libreng ibot sa ngipon, Provincial Disaster Risk Reduction and Management Office (PDRRMO) life-saving orientation, registration sa Yakap Program, PhilHealth verification, vital signs monitoring, tuli, registration ug libreng pag-print sa National ID, sa pagpatimbang ug uban pang serbisyong medikal. Lakip niini ang MSME training, product packaging ug labeling assistance, business consultation ug online registration sa business name pinaagi sa Department of Trade and Industry (DTI), mga serbisyong agrikultura sa Provincial Agriculturist’s Office (PAGRO) sama sa paghatag og semilya sa gulay ug uban pang pananom, ug anti-rabies sa mga kahayopan pinaagi sa Provincial Veterinarian’s Office (PVO), tambag legal sa Provincial Legal Office (PLO), ug uban pang serbisyo gikan sa nagkadaiyang departamento sa kapitolyo ug ubang ahensya sa gobyerno.
Dugang pa niini, nihatag usab og ice drop si Vice Mayor Franklin Gentiles sa mga katawhan ug libreng palugaw gikan sa buhatan sa gobernador. Sa pagpauli, bitbit sa mga baryohanon ang bugas matag pamilya. Sulti sa gobernador nga dili lang check-up, libre pa nilang makuha dayon ang mga tambal.
“Mga kaigsoonan ko, kining atong programa gihimo nato ‘ni sugod 2019, sa dihang nahimo ko ninyong gobernador sa probinsya. Mao ‘ni gitawag nato nga ang serbisyo sa gobyerno mao na mismo ang atong gidala sa tugkaran sa barangay,” sulti ni Gov Jubahib.
Sa susamang okasyon, gianunsyo usab ni Gob. Jubahib ang pagmontar karong tuiga sa pito ka andana nga gambalay sa Carmen District Zone Hospital ug ang mga doktor niini nagagikan sa nasod India, alang sa mas gipalapdan nga health services sa probinsya.
“Karong tuiga magsugod ta’g pa-building 7 stories. Naa ta’y budget karon nga P215 milyones kapin ug duna pa’y additional kay ang total budget for building lang is P1 bilyo. Mahimo na siyang specialist for heart, kidney, and liver ang Carmen, and of course, dialysis center, ug ang serbisyo nato dinha libre para sa inyoha,” dugang sa gobernador.
Samtang, ang mga clustered barangay nga nahimong kabahin sa Oplan KKK mao ang Barangay Salvacion, Quezon, Gredu, Datu Abdul, San Francisco, ug Brgy. New Visayas.
Ang maong kalihokan usa ka pagpamatuod sa padayon nga paningkamot sa probinsyal nga panggamhanan sa pagdala sa mga batakang serbisyo ngadto sa komunidad aron mapalambo ang kahimsog, panginabuhian, kalinaw, ug kinatibuk-ang kaayohan sa katawhan.
Writers: Ruby Llanto and Lorna TripoliPhoto: Ruby Llanto
